(Reuters)៖ សារព័ត៌មានអាមេរិក Axios នៅថ្ងៃសៅរ៍ ទី២៣ ខែឧសភា ឆ្នាំ២០២៦ (ម៉ោងនៅវ៉ាស៊ីនតោន) បានរាយការណ៍ថាសហរដ្ឋអាមេរិក និងអ៉ីរ៉ង់ខិតជិតឈានដល់ការចុះហត្ថលេខា លើកិច្ចព្រមព្រៀងមួយរួមបញ្ចូលការពន្យារបទឈប់បាញ់រយៈពេល៦០ថ្ងៃ ហើយក្នុងអំឡុងពេលនោះដែរ ច្រកសមុទ្រ Hormuz នឹងត្រូវបានបើកឡើងវិញ រីឯអ៉ីរ៉ង់នឹងត្រូវបានអនុញ្ញាតឱ្យលក់ ប្រេង ហើយកិច្ចចរចានឹងត្រូវធ្វើឡើងស្ដីពីការរឹតត្បិតកម្មវិធីនុយក្លេអ៊ែររបស់អ៉ីរ៉ង់។ នេះបើតាមការដកស្រង់ចេញផ្សាយដោយទីភ្នាក់ងារសារព័ត៌មាន Reuters។

Axios ដោយផ្អែកលើប្រភពដែលខ្លួនទទួលបានពីមន្ត្រីអាមេរិកម្នាក់ក្នុងលក្ខខណ្ឌមិនបញ្ចេញឈ្មោះ បានឱ្យដឹងថាអំឡុងបទឈប់បាញ់ ៦០ថ្ងៃ ច្រកសមុទ្រ Hormuz នឹងត្រូវបានបើកឡើងវិញ ដោយមិនមានការយកថ្លៃឆ្លងកាត់ ហើយអ៉ីរ៉ង់នឹងយល់ព្រមបោសសម្អាតគ្រាប់មីនដែលខ្លួនបានដាក់ពង្រាយក្នុងតំបន់ច្រកសមុទ្រនេះ ដើម្បីអនុញ្ញាតឱ្យកប៉ាល់ធ្វើដំណើរឆ្លងកាត់ដោយសេរី។

មន្ត្រីអាមេរិកដដែលបានប្រាប់ Axios ទៀតថាជាថ្នូរត្រឡប់ទៅវិញ នៅក្រោមកិច្ចព្រមព្រៀងខាងលើ សហរដ្ឋអាមេរិកនឹងលុបចោលការបិទខ្ទប់របស់ខ្លួនលើកំពង់ផែអ៉ីរ៉ង់ និងលើកលែងទណ្ឌកម្ម មួយចំនួនដែលអនុញ្ញាតឱ្យអ៉ីរ៉ង់លក់ប្រេងដោយសេរី។ សេចក្ដីព្រាងនៃកិច្ចព្រមព្រៀងមានរួមបញ្ចូលផងដែរការប្ដេជ្ញាចិត្តពីអ៉ីរ៉ង់ថានឹងមិនផលិតអាវុធនុយក្លេអ៊ែរ ហើយចរចាលើការផ្អាកកម្មវិធី ចម្រាញ់អ៊ុយរ៉ាញ៉ូម ព្រមទាំងបោះបង់ចោលស្ដុកអ៊ុយរ៉ាញ៉ូមដែលចម្រាញ់រួមក្នុងកម្រិតខ្ពស់។

បន្ថែមពីលើនេះ អំឡុង៦០ថ្ងៃ សហរដ្ឋអាមេរិកនឹងយល់ព្រមចរចាជុំវិញការដកទណ្ឌកម្ម និងបញ្ចេញទ្រព្យសម្បត្តិអ៉ីរ៉ង់ដែលត្រូវបានបង្កក។ យ៉ាងណាក៏ដោយ សេតវិមានមិនទាន់ឆ្លើយតបទៅនឹង ការស្នើសុំការអត្ថាធិប្បាយពី Reuters​ ពាក់ព័ន្ធនឹងការចុះផ្សាយរបស់សារព័ត៌មាន Axios នៅឡើយទេ៕