(តេហេរ៉ង់)៖ អ៉ីរ៉ង់ នៅថ្ងៃអាទិត្យ ទី២៤ ខែឧសភា ឆ្នាំ២០២៦ បានប្រហារជីវិតដោយព្យួរកបុរសម្នាក់ជាប់ពិរុទ្ធពីបទធ្វើចារកម្ម ហើយដែលនេះជាការប្រកាសជាសាធារណៈលើកដំបូងបំផុតពី ការប្រហារជីវិតមនុស្សដែលរងការចោទប្រកាន់ពីបទធ្វើចារកម្មឱ្យសត្រូវអំឡុងសង្រ្គាមជាមួយអ៉ីស្រាអែល និងសហរដ្ឋអាមេរិក។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

តាមគេហទំព័រតុលាការអ៉ីរ៉ង់ បុរសដែលត្រូវបានប្រហារជីវិតខាងលើមានឈ្មោះ Mojtaba Kian ដែលត្រូវបានតុលាការអ៉ីរ៉ង់រកឃើញថារូបគេមានពិរុទ្ធភាពលើបទចោទបញ្ជូនព័ត៌មានពាក់ព័ន្ធនឹង ឧស្សាហកម្មការពារជាតិទៅឱ្យសត្រូវ។ បុរសរូបនេះត្រូវបានប្រហារជីវិតដោយការព្យួរកនៅព្រឹកនៅថ្ងៃអាទិត្យ។

តុលាការអ៉ីរ៉ង់បានអះអាងថា Mojtaba Kian បានបញ្ជូនព័ត៌មានពាក់ព័ន្ធនឹងសមត្ថភាពការពារជាតិរបស់អ៉ីរ៉ង់ទៅឱ្យសត្រូវ អំឡុងសង្រ្គាមជិត៤០ថ្ងៃជាមួយអ៉ីស្រាអែល និងសហរដ្ឋអាមេរិក។ ការប្រហារជីវិតនេះដែរជាការប្រហារជីវិតលើដំបូងបំផុតដែលទាក់ទិនដោយផ្ទាល់នឹងបទចោទធ្វើចារកម្មឱ្យសត្រូវត្រូវបានប្រព្រឹត្តអំឡុងសង្រ្គាម ដែលបានផ្ទុះឡើងក្រោយសហរដ្ឋអាមេរិក និងអ៉ីស្រាអែលបើកការវាយប្រហារលើអ៉ីរ៉ង់កាលពីថ្ងៃទី២៨ ខែកុម្ភៈ ឆ្នាំ២០២៦៕