(ម៉ាណាម៉ា)៖ តុលាការប្រទេសបារ៉ែន បានសម្រេចផ្តន្ទាទោសជនជាប់ចោទចំនួន ៩នាក់ឱ្យជាប់ពន្ធនាគារអស់មួយជីវិត និង ២នាក់ផ្សេងទៀតឱ្យជាប់គុក ៣ឆ្នាំ ពីបទសហការជាមួយកងឆ្មាំបដិវត្តន៍អ៊ីរ៉ង់ ដើម្បីរៀបចំគម្រោងប្រព្រឹត្ត «អំពើអរិភាព និងភេរវកម្ម» ប្រឆាំងនឹងប្រទេសរបស់ខ្លួន។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

យោងតាមសេចក្តីថ្លែងការណ៍របស់អាជ្ញាធរបារ៉ែន ជនជាប់ចោទទាំងនោះបានជាប់ពាក់ព័ន្ធនឹងសកម្មភាពប្រមូលព័ត៌មានស្តីពីទីតាំងរសើបនានា និងបានជួយសម្រួលដល់ការផ្ទេរប្រាក់ដើម្បីគាំទ្រដល់ប្រតិបត្តិការយោធា។ ចំណាត់ការនេះធ្វើឡើងបន្ទាប់ពីក្រសួងមហាផ្ទៃបារ៉ែន កាលពីដើមខែនេះ បានប្រកាសចាប់ខ្លួនមនុស្សចំនួន ៤១នាក់ ដែលត្រូវបានរកឃើញថាមានទំនាក់ទំនងយ៉ាងស្អិតរមួតជាមួយកងកម្លាំង IRGC។

គួររំលឹកថា ប្រទេសអ៊ីរ៉ង់បានបើកការវាយប្រហារលើគោលដៅនានាក្នុងប្រទេសបារ៉ែន និងបណ្តាប្រទេសក្នុងតំបន់ឈូងសមុទ្រដែលធ្វើជាម្ចាស់ផ្ទះទទួលមូលដ្ឋានទ័ពអាមេរិក បន្ទាប់ពីសហរដ្ឋអាមេរិក និងអ៊ីស្រាអែល បានបើកសង្គ្រាមវាយប្រហារលើអ៊ីរ៉ង់ កាលពីថ្ងៃទី២៨ ខែកុម្ភៈ កន្លងទៅ ដែលបង្កឱ្យមានវិបត្តិអសន្តិសុខយ៉ាងខ្លាំងទូទាំងតំបន់មជ្ឈិមបូព៌ា៕