(ហ្ស៊េរុយសាឡិម)៖ នាយករដ្ឋមន្ត្រីអ៉ីស្រាអែល លោក Benjamin Netanyahu កាលពីថ្ងៃអាទិត្យ ទី២៤ ខែឧសភា ឆ្នាំ២០២៦ បាននិយាយថារូបលោក និងប្រធានាធិបតីអាមេរិក លោក ដូណាល់ ត្រាំ បានព្រមព្រៀងនឹងគ្នាថាកិច្ចព្រមព្រៀងចុងក្រោយណាមួយជាមួយអ៉ីរ៉ង់ ត្រូវតែលុបបំបាត់ចោលការគំរាមកំហែងនុយក្លេអ៊ែរបង្កឡើងដោយតេហេរ៉ង់។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

ក្នុងការបង្ហោះមួយលើបណ្ដាញ Telegram លោក Netanyahu បានបញ្ជាក់ថាអ្វីដែលលោកបានលើកឡើង គឺចង់សំដៅលើការរំសាយចោលរោងចក្រចម្រាញ់អ៊ុយរ៉ាញ៉ូមរបស់អ៉ីរ៉ង់ និងការបញ្ជូនអ៊ុយរ៉ាញ៉ូមដែលត្រូវបានចម្រាញ់រួចចេញពីប្រទេសអ៉ីរ៉ង់។ ការកត់សម្គាល់បែបនេះរបស់លោក Netanyahu បន្ទាប់ពីរូបលោកបានបើកកិច្ចពិភាក្សាតាមទូរស័ព្ទជាមួយលោកប្រធានាធិបតី ដូណាល់ ត្រាំ អំពីលទ្ធភាពនៃការឈានដល់កិច្ចព្រមព្រៀងរវាងទីក្រុងវ៉ាស៊ីនតោន និងអ៉ីរ៉ង់ កាលពីថ្ងៃសៅរ៍ចុងសប្ដាហ៍កន្លងទៅ។

បើតាមប្រភពពីក្រុមមន្ត្រីអ៉ីស្រាអែល សហរដ្ឋអាមេរិកបានធ្វើបច្ចុប្បន្នភាពយ៉ាងជាប់លាប់ឱ្យអ៉ីស្រាអែល ពាក់ព័ន្ធនឹងកិច្ចចរចាជាមួយអ៉ីរ៉ង់។ ក្រុមមន្ត្រីអ៉ីស្រាអែលថែមទាំងអះអាងទៀតផងថាលោក ត្រាំ បានបញ្ជាក់ច្បាស់ៗថារូបលោកនឹងប្រកាន់ជំហរម៉ឺងម៉ាត់ក្នុងកិច្ចចរចា ចំពោះសំណើរបស់លោកសម្រាប់ការរំសាយចោលកម្មវិធីនុយក្លេអ៊ែរអ៉ីរ៉ង់ និងបញ្ជូនអ៊ុយរ៉ាញ៉ូមចម្រាញ់រួចចេញពីទឹកដីអ៉ីរ៉ង់ ហើយនឹងមិនចុះកិច្ចព្រមព្រៀងជាមួយតេហេរ៉ង់ឡើយ ប្រសិនបើលក្ខខណ្ឌទាំងនេះមិនត្រូវបានបំពេញជាមុនសិនទេនោះ៕