(កៀវ)៖ រុស្ស៉ី កាលពីថ្ងៃអាទិត្យ ទី២៤ ខែឧសភា ឆ្នាំ២០២៦ បានបើកការវាយប្រហារទ្រង់ទ្រាយធំមួយលើរដ្ឋធានីកៀវ និងតំបន់ជុំវិញរដ្ឋធានីរបស់អ៊ុយក្រែន ដោយប្រើដ្រូន និងមីស៊ីល ក្នុងចំនួនដ៏ច្រើន ហើយនេះស្ថិតក្នុងចំណោមការវាយប្រហារតាមផ្លូវអាកាសទ្រង់ទ្រាយធំបំផុតលើរដ្ឋធានីអ៊ុយក្រែន ចាប់តាំងពីសង្រ្គាមផ្ទុះឡើងរយៈពេល ៤ឆ្នាំមកនេះ ក្នុងនោះមានទាំង ការបាញ់មីស៊ីលល្បឿនលឿនជាងសំឡេង Oreshnik មួយគ្រាប់លើគោលដៅក្បែររដ្ឋធានីកៀវ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ក្រុមមន្ត្រីអ៊ុយក្រែន បានឱ្យដឹងថាការវាយប្រហាររបស់រុស្ស៉ីបានសម្លាប់មនុស្ស ២នាក់ ក្នុងរដ្ឋធានីកៀវ និង២នាក់ទៀតនៅក្នុងតំបន់ស្ថិតនៅជុំវិញរដ្ឋធានីនេះ ព្រមទាំងបង្កឱ្យមនុស្សជិត ១០០នាក់ បានរងរបួស។ តាមក្រុមមន្ត្រីអ៊ុយក្រែន អគារ និងសាលារៀងជាច្រើនខ្នងបានរងការខូចខាត ដែលភាគច្រើនស្ថិតនៅចំកណ្ដាលរដ្ឋធានីកៀវ ខណៈក៏មានសេចក្ដីរាយការណ៍ពី ការវាយប្រហាររបស់រុស្ស៉ីលើផ្នែកជាច្រើនទៀតរបស់អ៊ុយក្រែនផងដែរ ក្នុងនោះមានមនុស្ស ២នាក់បានស្លាប់នៅក្នុងតំបន់ Kherson។

បណ្ដាមេដឹកនាំអឺរ៉ុបបានចេញមុខថ្កោលទោសការវាយប្រហាររបស់រុស្ស៉ី ដោយអាល្លឺម៉ង់ និងអង់គ្លេសបានចាត់ទុកថាការប្រើប្រាស់មីស៊ីល Oreshnik ដែលមានសមត្ថភាពពាំ ក្បាលគ្រាប់នុយក្លេអ៊ែរ គឺជាទង្វើបង្កើនជម្លោះ។ នេះជាលើកទី៣ ដែលរុស្ស៉ីប្រើប្រាស់ Oreshnik ក្នុងការវាយប្រហារលើអ៊ុយក្រែន គិតចាប់តាំងពីសង្រ្គាមបានផ្ទុះឡើងកាលពីខែកុម្ភៈ ឆ្នាំ២០២២។

គួរបញ្ជាក់ថា បើតាមសេចក្ដីរាយការណ៍ ក្នុងការវាយប្រហារលើអ៊ុយក្រែនកាលពីថ្ងៃអាទិត្យ រុស្ស៉ីបានបាញ់មីស៊ីល ៩០គ្រាប់ និងដ្រូន ៦០០គ្រឿង៕