(តេហេរ៉ង់)៖ ប្រធានាធិបតីអ៉ីរ៉ង់ លោក Masoud Pezeshkian បានចេញបញ្ជាឱ្យបើកប្រព័ន្ធអ៉ីនធើណិតសកលឡើងវិញនៅក្នុងប្រទេសអ៉ីរ៉ង់ បន្ទាប់ពីត្រូវបានបិទចាប់តាំងពីសហរដ្ឋអាមេរិក និងអ៉ីស្រាអែល បើកការវាយប្រហារលើអ៉ីរ៉ង់កាលពីថ្ងៃទី២៨ ខែកុម្ភៈមក។ នេះបើតាមប្រព័ន្ធផ្សព្វផ្សាយរដ្ឋអ៉ីរ៉ង់ដកស្រង់ចេញផ្សាយដោយទីភ្នាក់ងារសារព័ត៌មាន AFP។

ទីភ្នាក់ងារសារព័ត៌មានអ៉ីរ៉ង់ Tasnim និង Fars កាលពីថ្ងៃចន្ទ ទី២៥ ខែឧសភា ឆ្នាំ២០២៦ បានរាយការណ៍ថា «លោកប្រធានាធិបតីអ៉ីរ៉ង់បានចេញបញ្ជាឱ្យក្រសួងទូរគមនាគមន៍បើកដំណើរការ ប្រព័ន្ធអ៉ីនធើណិតឡើងវិញ ដោយត្រឡប់ទៅស្ថានភាពមុនខែមករា»។

គួរបញ្ជាក់ថា អាជ្ញាធរអ៉ីរ៉ង់បានបិទដំណើរការអ៉ីនធើណិតសកល អំឡុងផ្ទុះបាតុកម្មតវ៉ាទ្រង់ទ្រាយធំប្រឆាំងនឹងរដ្ឋាភិបាលទីក្រុងតេហេរ៉ង់កាលពីខែមករា ឆ្នាំ២០២៦ និងក្រោយមកបានបន្តបិទជាថ្មី នៅថ្ងៃទី២៨ ខែកុម្ភៈក្រោយសហរដ្ឋអាមេរិក និងអ៉ីស្រាអែលបើកការវាយប្រហារលើអ៉ីរ៉ង់។ ចាប់តាំងពីពេលនោះមកដែរ ប្រជាជនអ៉ីរ៉ង់អាចចូលប្រើកម្មវិធី និងគេហទំព័រក្នុងស្រុកតែប៉ុណ្ណោះ៕