(បេរូត)៖ យោធាអ៉ីស្រាអែលបានបង្កើនការវាយប្រហារលើភាគខាងត្បូងនៃប្រទេសលីបង់ កាលពីថ្ងៃចន្ទ ទី២៥ ខែឧសភា ឆ្នាំ២០២៦ ក្រោយនាយករដ្ឋមន្ត្រី លោក Benjamin Netanyahu​ បាននិយាយថារូបលោកបានបញ្ជាឱ្យយោធាអ៉ីស្រាអែលបង្កើនការវាយលុករបស់ខ្លួនក្នុងប្រទេសលីបង់ នៅក្រោមកិច្ចប្រឹងប្រែងមួយដើម្បី វាយបំបាក់ក្រុមហេសបូឡាគាំទ្រដោយអ៉ីរ៉ង់។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

ការបង្កើនការវាយប្រហារតាមផ្លូវអាកាសរបស់អ៉ីស្រាអែលធ្វើឡើង ចំពេលសហរដ្ឋអាមេរិក និងអ៉ីរ៉ង់កំពុងព្យាយាមបង្ហើយលក្ខខណ្ឌនៃកិច្ចព្រមព្រៀងមួយដើម្បីបិទបញ្ចប់ សង្រ្គាម ដែលក្នុងនោះអាចនឹងរួមបញ្ចូលទាំងសមរភូមិនៅលីបង់ជាទីដែលអ៉ីស្រាអែល និងក្រុមហេសបូឡាកំពុងវាយប្រយុទ្ធគ្នាចាប់តាំងពីថ្ងៃទី២ ខែមីនាមក។

ទោះបីជាមានបទឈប់បាញ់បានចូលជាធរមានកាលពីថ្ងៃទី៧ ខែមេសាមកក៏ដោយ ក៏អ៉ីស្រាអែល និងក្រុមហេសបូឡានៅតែបន្តបាញ់ប្រយុទ្ធគ្នាស្ទើរតែរៀងរាល់ថ្ងៃ។ «ខ្ញុំបានចេញបញ្ជាឱ្យបង្កើនប្រតិបត្តិការយោធារបស់យើង...ដើម្បីវាយបំបាក់ពួកគេ (ហេសបូឡា)»។ នេះជាការលើកឡើងរបស់លោក Netanyahu ក្នុងសេចក្ដីថ្លែងការណ៍ជាវីដេអូបង្ហោះលើឆាណែល Telegram របស់លោក។

គួរបញ្ជាក់ថា បើតាមអាជ្ញាធរសុខាភិបាលលីបង់ ការវាយប្រហារតាមផ្លូវអាកាសរបស់អ៉ីស្រាអែល ចាប់តាំងពីដើមខែមីនាមក បានសម្លាប់មនុស្សច្រើនជាង ៣១០០នាក់។ យោធាអ៉ីស្រាអែល កាលពីថ្ងៃចន្ទក៏បានប្រកាសដែរថាទាហានរបស់ខ្លួនម្នាក់ត្រូវបានសម្លាប់នៅភាគខាងត្បូងលីបង់ ធ្វើឱ្យចំនួនទាហានអ៉ីស្រាអែលស្លាប់ ចាប់តាំងពីផ្ទុះសង្រ្គាមជាមួយហេសបូឡា កើនដល់ ២៣នាក់៕