(កៀវ)៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បាននិយាយកាលពីថ្ងៃចន្ទសប្តាហ៍នេះថា ការពិភាក្សាជាមួយសហរដ្ឋអាមេរិក លើការពង្រីកការផលិតប្រព័ន្ធប្រឆាំងមីស៉ីល មានភាពរីកចម្រើនតិចតួចប៉ុណ្ណោះ ហើយអ៊ុយក្រែនកំពុងធ្វើការជាមួយអឺរ៉ុប ដើម្បីដោះស្រាយបញ្ហានេះ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃអង្គារ ទី២៦ ខែឧសភា ឆ្នាំ២០២៦។

នៅក្នុងសារជាវីដេអូ លោក ហ្សេលេនស្គី ក៏បានលើកឡើងពីសារៈសំខាន់របស់សហរដ្ឋអាមេរិក ក្នុងការបន្តជួយអ៊ុយក្រែនផងដែរ។ ក្រៅពីនេះលោកបានថ្លែងអំណរគុណចំពោះប្រធានាធិបតីបារាំង លោក Emmanuel Macron សម្រាប់តួនាទីរបស់លោក ក្នុងការអភិវឌ្ឍប្រព័ន្ធការពារមីស៉ីល ហើយនិយាយថា អឺរ៉ុបពិតជាបានជួយដល់អ៊ុយក្រែន ក្នុងការផ្តល់ជំនួយហិរញ្ញវត្ថុដើម្បីផលិតអាវុធ។

គួរបញ្ជាក់ថា គំនិតផ្តួចផ្តើមផ្នែកការទូត ដែលដឹកនាំដោយសហរដ្ឋអាមេរិក ដើម្បីឆ្ពោះទៅរកដំណោះស្រាយនៃសង្គ្រាមជាង ៤ឆ្នាំរវាងរុស្ស៉ី និងអ៊ុយក្រែន បានជាប់គាំង ដោយផ្តោតអាមេរិក ងាកទៅផ្តោតលើសង្គ្រាមជាមួយអ៉ីរ៉ង់កាន់តែខ្លាំង៕