(ប៉េកាំង)៖ ចិន និងប៉ាគីស្ថាន បានឈានដល់ការឯកភាពទូលំទូលាយថ្មីមួយ លើការធ្វើឱ្យកាន់តែស៉ីជម្រៅ នូវទំនាក់ទំនងយុទ្ធសាស្ត្រ ដើម្បីពង្រឹងការអភិវឌ្ឍច្រករបៀងសេដ្ឋកិច្ចរួម និងបង្កើតកំពង់ផែ Gwadar ជាមជ្ឈមណ្ឌលតភ្ជាប់ក្នុងតំបន់។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃអង្គារ ទី២៦ ខែឧសភា ឆ្នាំ២០២៦។

ការកត់សម្គាល់នេះធ្វើឡើងក្នុងសេចក្តីថ្លែងការណ៍រួមមួយ បន្ទាប់ពីជំនួបនៃនាយករដ្ឋមន្រ្តីប៉ាគីស្ថាន លោក Shehbaz Sharif ជាមួយប្រធានាធិបតីចិន ស៉ី ជីនពីង និងនាយករដ្ឋមន្រ្តីចិន លោក Li Qiang។ សេចក្តីថ្លែងការណ៍គូសបញ្ជាក់ថា «ប្រទេសទាំងពីរស្វាគមន៍ភាគីទីបី ក្នុងការចូលរួមក្នុងការអភិវឌ្ឍ ច្រករបៀងសេដ្ឋកិច្ចចិន និងប៉ាគីស្ថាន (CPEC)ក្រោមគំរូដែលបានព្រមព្រៀងគ្នា»។

ចិន និងប៉ាគីស្ថាន ព្រមព្រៀងលើកកម្ពស់គុណភាព CPEC ដែលជាគម្រោងសំខាន់ នៃគំនិតផ្តួចផ្តើមខ្សែក្រវាត់ និងផ្លូវរបស់ចិន អភិវឌ្ឍកំពង់ផែ Gwadar របស់ប៉ាគីស្ថាន និងពង្រឹងការតភ្ជាប់ផ្លូវ និងកំពង់ផែ។ ផែនការទាំងនេះរួមបញ្ចូលផ្លូវ Khunjerab Pass និងការធ្វើឱ្យប្រសើរឡើងនៃផ្លូវ Karakoram ដែលជាផ្លូវតភ្ជាប់ផ្លូវគោកដ៏សំខាន់រវាងចិន និងប៉ាគីស្ថាន។

ប៉ាគីស្ថាន ក៏បានសន្យាជំរុញសន្តិសុខ និងកិច្ចសហប្រតិបត្តិការ ដើម្បីធានាសុវត្ថិភាពរបស់ពលករចិន និងការវិនិយោគនៅក្នុងប្រទេសប៉ាគីស្ថាន ដែលជាក្តីកង្វល់ធំសម្រាប់ប៉េកាំង បន្ទាប់ពីមានករណីវាយប្រហារម្តងហើយម្តងទៀត ដោយក្រុមសកម្មប្រយុទ្ធលើជនជាតិ និងគម្រោងរបស់ខ្លួន។

គួរបញ្ជាក់ថា នាយករដ្ឋមន្រ្តីប៉ាគីស្ថាន បានធ្វើទស្សនកិច្ចទៅកាន់ទីក្រុងប៉េកាំង ខណៈដែលទីក្រុងអ៉ីស្លាម៉ាបាដ ស្វែងរកការវិនិយោគថ្មីៗ ចំពេលមានភាពតានតឹងជាមួយអាហ្វហ្កានីស្ថាន និងការចូលរួមសម្រុះសម្រួលក្នុងសង្គ្រាមអ៉ីរ៉ង់៕