(តូក្យូ)៖ រដ្ឋាភិបាលជប៉ុន បានអនុម័តកញ្ចប់ថវិកាចំណាយចំនួន ៣ពាន់លានដុល្លារ ដើម្បីឧបត្ថម្ភដល់ប្រជាជន សម្រាប់ការបង់ថ្លៃអគ្គិសនី និងហ្គាស ខណៈដែលថ្លៃប្រើប្រាស់ បានកើនឡើងដោយសារសង្គ្រាមនៅមជ្ឈិមបូព៌ា។
នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP នាថ្ងៃអង្គារ ទី២៧ ខែឧសភា ឆ្នាំ២០២៦។

ប្រធានខុទ្ធកាល័យនៃគណៈរដ្ឋមន្រ្តីជប៉ុន លោក Masanao Ozaki បានឱ្យដឹងថា «យើងបានអនុម័តថវិកា ៥១៣.៥ពាន់លានយ៉េន ក្នុងកិច្ចប្រជុំគណៈរដ្ឋមន្ត្រីថ្ងៃនេះ» សម្រាប់បង់ថ្លៃវិក្កយបត្រអគ្គិសនី និងឧស្ម័ន នៅចន្លោះខែកក្កដា និងខែកញ្ញា។ ការឧបត្ថម្ភធនបានមកពីទុនបម្រុង ដែលបញ្ចូលក្នុងថវិកាឆ្នាំ២០២៦។

តាមលោក Ozaki ថ្លៃអគ្គិសនី និងឧស្ម័នទំនងជាមិនកើនទៀតទេ ក្នុងខែនេះ ឬឆ្នាំក្រោយ ប៉ុន្តែកើនឡើងថ្លៃនាំចូលប្រេងឥន្ធនៈ នឹងក្លាយជាកត្តាមួយបន្ទាប់ពីនោះ។ លោកស្រី Takaichi បាន​និយាយ​ថា រដ្ឋាភិបាល​រំពឹង​ថា​ នឹង​អាច​ធានា​បាន​ការ​ផ្គត់ផ្គង់​ប្រេង រហូត​ដល់​រដូវ​ផ្ការីក​ក្រោយ៕