ក្រោយកិច្ចប្រជុំកម្រិតរដ្ឋមន្រ្តីការបរទេស ក្រុមប្រទេស Quad ប្រកាសកិច្ចសហប្រតិបត្តិការដែនសមុទ្រ និងរ៉ែសំខាន់ (Video inside)
26-05-2026 15:56
(ញូវដែលី)៖ សហរដ្ឋអាមេរិក ឥណ្ឌា អូស្ត្រាលី និងជប៉ុន ដែលជាសមាជិកនៃក្រុមប្រទេស Quad បានប្រកាសកិច្ចសហប្រតិបត្តិការថ្មីដែនសមុទ្រ និងរ៉ែសំខាន់ៗ បន្ទាប់ពីមានមន្ទិលសង្ស័យជុំវិញការប្តេជ្ញាចិត្ត និងភាពខ្វែងគំនិតគ្នាលើបញ្ហាអ៉ីរ៉ង់។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃអង្គារ ទី២៦ ខែឧសភា ឆ្នាំ២០២៦។
ក្នុងកិច្ចប្រជុំកម្រិតរដ្ឋមន្រ្តី Quad លោក Marco Rubio រដ្ឋមន្រ្តីការបរទេសអាមេរិក បាននិយាយថា ប្រទេសទាំង ៤ នឹងធ្វើការរួមគ្នាលើគំនិតផ្តួចផ្តើមដែនសមុទ្រចំនួនពីរ ដែលរួមបញ្ចូលសមត្ថភាពឃ្លាំមើល និងការផ្តល់នូវព័ត៌មានអំពីពេលវេលាជាក់ស្តែង សម្រាប់ចរាចរណ៍ពាណិជ្ជកម្មនៅសមុទ្រ។
សេរីភាពនៃការធ្វើនាវាចរណ៍ គឺជាពាក្យគន្លឹះរបស់ទីក្រុងវ៉ាស៉ីនតោនជាយូរមកហើយ សម្រាប់ការប្រឆាំងនឹងការទាមទាររបស់ចិននៅដែនសមុទ្រ ដែលជាក្តីបារម្ភពិសេសសម្រាប់ជប៉ុន។ រដ្ឋមន្ត្រីការបរទេសឥណ្ឌា លោក Subrahmanyam Jaishankar បាននិយាយថា ការផ្តោតសំខាន់នៃកិច្ចពិភាក្សា គឺអំពីឥណ្ឌូប៉ាស៉ីហ្វិក ដែលជាដែនកំណត់ជាក់លាក់នៃ Quad។ រដ្ឋមន្ត្រីការបរទេសអូស្ត្រាលី លោកស្រី Penny Wong បានឱ្យដឹងថា Quad កំពុងសហការជួយដល់ការអភិវឌ្ឍកំពង់ផែហ្វីជី ដែលជាប្រទេសកោះសំខាន់មួយ នៅប៉ាស៉ីហ្វិកខាងត្បូង ដែលចិនកំពុងមានឥទ្ធិពលខ្លាំងឡើង។
តាមលោក Rubio, Quad ក៏នឹងបង្កើនកិច្ចខិតខំប្រឹងប្រែង ដើម្បីធានាការផ្គត់ផ្គង់សារធាតុរ៉ែសំខាន់ៗផងដែរ ចំពោះមុខក្តីបារម្ភចំពោះការគ្រប់គ្រងរបស់ចិន នៅក្នុងធនធានគន្លឹះនៃវិស័យបច្ចេកវិទ្យាកម្រិតខ្ពស់៕
