(ញូវដេលី)៖ រដ្ឋមន្ត្រីការបរទេសនៃបួនប្រទេស រួមមានអូស្ត្រាលី ឥណ្ឌា ជប៉ុន និងសហរដ្ឋអាមេរិក បានយល់ព្រមរួមគ្នាសាងសង់កំពង់ផែមួយកន្លែងនៅក្នុងប្រទេសហ្វីជី (Fiji) និងបានចុះហត្ថលេខាលើកិច្ចព្រមព្រៀងគ្របដណ្តប់លើធនធានរ៉ែសំខាន់ៗ និងសន្តិសុខថាមពល ដើម្បីស្តារថាមពលថ្មីដល់សម្ព័ន្ធភាពរបស់ពួកគេដែលត្រូវបានគេស្គាល់ថា Quad។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ជំនួបដ៏ខ្លីរវាងអ្នកការទូតកំពូលៗ នៃប្រទេសសម្ព័ន្ធមិត្តទាំងបួននេះ បានប្រកាសពីគម្រោងហេដ្ឋារចនាសម្ព័ន្ធរួមគ្នាលើកដំបូងរបស់ខ្លួន គឺកំពង់ផែនៅក្នុងប្រទេសហ្វីជី ដើម្បីឆ្លើយតបទៅនឹងការខ្វះខាតសមត្ថភាពកំពង់ផែនៅក្នុងតំបន់កោះប៉ាស៊ីហ្វិក។

គួរបញ្ជាក់ថា ក្រុមប្រទេសទាំងបួននេះហាក់បានបាត់បង់សន្ទុះខ្លះៗកាលពីឆ្នាំមុន បន្ទាប់ពីខកខានមិនបានរៀបចំកិច្ចប្រជុំកំពូលមេដឹកនាំ ដោយសារតែភាពតានតឹងរវាងប្រធានាធិបតីអាមេរិក លោក ដូណាល់ ត្រាំ និងនាយករដ្ឋមន្ត្រីឥណ្ឌា លោក ណារិនដ្រា ម៉ូឌី ជុំវិញបញ្ហាពន្ធគយ និងបញ្ហាផ្សេងៗទៀត។

ទោះជាយ៉ាងណា លោក រូប៊ីយ៉ូ បានបញ្ជាក់ថា បច្ចុប្បន្នក្រុម Quad កំពុងចាប់ផ្តើមបង្ហាញពីសមិទ្ធផលពិតប្រាកដ ដោយលោកបានសង្កត់ធ្ងន់ថា ភាពជាដៃគូនេះគឺជា «សសរស្តម្ភដ៏សំខាន់» នៃយុទ្ធសាស្ត្រសកលរបស់សហរដ្ឋអាមេរិក។ បន្ថែមពីនេះ ក្រុម Quad ក៏បានឯកភាពគ្នាបង្កើតគំនិតផ្តួចផ្តើមស្តីពីសន្តិសុខថាមពលឥណ្ឌូ-ប៉ាស៊ីហ្វិក និងក្របខណ្ឌគ្រប់គ្រងរ៉ែសំខាន់ៗផងដែរ៕