(New York, សហរដ្ឋអាមេរិក)៖ រដ្ឋមន្រ្តីការបរទេសចិន លោក Wang Yi បាននិយាយថា ប៉េកាំងត្រៀមខ្លួនរួចជាស្រេច ក្នុងការពង្រឹងកិច្ចសហប្រតិបត្តិការជាក់ស្តែង ជាមួយប៉ាណាម៉ា ខណៈដែលលោកបានស្នើប្រទេសអាមេរិកកណ្តាលមួយនេះ ឱ្យការពារសិទ្ធិក្រុមហ៊ុនចិន អំឡុងពេលជួបរដ្ឋមន្ត្រីការបរទេសប៉ាណាម៉ា លោក Javier Martínez-Acha។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃពុធ ទី២៧ ខែឧសភា ឆ្នាំ២០២៦។

ដោយសំដៅទៅសម្ពាធរបស់សហរដ្ឋអាមេរិក លើហេដ្ឋារចនាសម្ព័ន្ធពាក់ព័ន្ធជាមួយចិន ក្បែរព្រែកជីកប៉ាណាម៉ា ទីភ្នាក់ងារសារព័ត៌មានរដ្ឋ Xinhua រាយការណ៍ថា លោក Wang ដែលបានជួបលោក Acha ខាងក្រៅកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិ (UN) នៅទីក្រុងញូវយ៉ក បាននិយាយថា ទំនាក់ទំនងរវាងចិន និងប៉ាណាម៉ា មិនគួរទទួលរងការជ្រៀតជ្រែកពីភាគីទី ៣ឡើយ។

ជំនួបនេះកើតឡើង បន្ទាប់ពីមានភាពតានតឹងអស់ជាច្រើនខែ ជុំវិញអនាគតផែកុងតឺន័រសំខាន់ពីរគឺ Balboa ​​និង Cristobal ដែលមានទីតាំងនៅជិតច្រក Pacific និង Atlantic មកកាន់ព្រែកជីកប៉ាណា។ ព្រែកជីកប៉ាណាម៉ា គ្រប់គ្រងប្រហែល ៥ភាគរយ ៥ភាគរយនៃពាណិជ្ជកម្មដែនសមុទ្ររបស់ពិភពលោក។

ថ្មីៗនេះអាជ្ញាធរ​ចិន និង​នៅទីក្រុងហុងកុង ​បានជំទាស់នឹង​សេចក្តីសម្រេចលុបអាជ្ញាប័ណ្ណកំពង់ផែរបស់​​ក្រុមហ៊ុនហុងកុង CK Hutchison នៅប៉ាណាម៉ា ដែលប្រតិបត្តិការអស់រាប់ទសវត្សរ៍មកហើយ។ ការ​លុបចោល​នេះ ផ្អែក​​តាម​សម្ពាធ​របស់​សហរដ្ឋអាមេរិក ដើម្បី​ទប់ស្កាត់​ឥទ្ធិពល​របស់​ចិន​នៅទីនោះ៕