(វ៉ាស៉ីនតោន)៖ កាលពីថ្ងៃពុធ ទី២៧ ខែឧសភា ឆ្នាំ២០២៦ ប្រធានាធិបតីអាមេរិក លោក ដូណាល់ ត្រាំ បានគំរាមប្រើកម្លាំងយោធា​ប្រឆាំងអូម៉ង់ ប្រសិនបើប្រទេសអារ៉ាប់មួយនេះ ហ៊ានចូលដៃចូលជើងជាមួយអ៉ីរ៉ង់ ក្នុងការគ្រប់គ្រងច្រកសមុទ្រ Hormuz។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

អំឡុងកិច្ចប្រជុំគណៈរដ្ឋមន្រ្តីអាមេរិកកាលពីថ្ងៃពុធ អ្នកសារព័ត៌មានម្នាក់បានស្នើឱ្យលោក ត្រាំ ផ្តល់មតិជុំវិញគំនិតនៃការដែលអូម៉ង់និងអ៉ីរ៉ង់ ចាត់ចែងរួមគ្នាលើលំហូរពាណិជ្ជកម្ម នៅច្រកសមុទ្រយុទ្ធសាស្រ្តខាងលើ ជាទីដែលប្រេងនិងឧស្ម័ន២០ភាគរយរបស់ពិភពលោក ធ្វើចរាចរណ៍ឆ្លងកាត់ជាប្រចាំ កាលពីមុនពេលផ្ទុះសង្រ្គាម។

អ្នកសារព័ត៌មានបានសួរដូច្នេះថា «តើលោកទទួលយកកិច្ចព្រមព្រៀងរយៈពេលខ្លីមួយ ដែលអនុញ្ញាតឱ្យអ៉ីរ៉ង់និងអូម៉ង់គ្រប់គ្រង​ច្រកសមុទ្រ Hormuz ដែរឬទេ»។ លោកប្រធានាធិបតីអាមេរិក បានឆ្លើយតបថា «គ្មាននរណានឹងគ្រប់គ្រងច្រកសមុទ្រនេះទេ។ វាគឺជាផ្លូវទឹកអន្តរជាតិ ហើយអូម៉ង់នឹងត្រូវប្រព្រឹត្តខ្លួនឱ្យល្អដូចអ្នកដទៃទៀតដែរ ព្រោះថាបើពុំដូច្នោះទេ យើងនឹងត្រូវតែវាយប្រហារ​លើពួកគេ»។

អូម៉ង់ដែលត្រូវគេស្គាល់ថាជាប្រទេសអព្យាក្រឹតមួយ មិនធ្លាប់និយាយដោយផ្ទាល់ថា ខ្លួនចង់ចូលរួមជាមួយអ៉ីរ៉ង់ ក្នុងការគ្រប់គ្រង​ច្រកសមុទ្រ Hormuz ឡើយ។​ សហរដ្ឋអាមេរិកនិងអូម៉ង់ គឺជាសម្ព័ន្ធមិត្តជិតស្និទ្ធ ដែលទំនាក់ទំនងមានអាយុកាលជាង២០០ឆ្នាំ។ ប្រទេសទាំងពីរ មានសន្ធិសញ្ញាកិច្ចសហប្រតិបត្តិការជាច្រើន រួមមានទាំងភាពជាដៃគូផ្នែកសន្តិសុខ កិច្ចព្រមព្រៀងពាណិជ្ជកម្មសេរី ក៏ដូចជាកិច្ចព្រមព្រៀងវិទ្យាសាស្រ្តនិងបច្ចេកវិទ្យា។

គួរបញ្ជាក់ថា កន្លងមកអូម៉ង់ក៏ធ្លាប់ដើរតួនាទីជា អ្នកសម្រុះសម្រួលសំខាន់មួយផងដែរ រវាងទីក្រុងវ៉ាស៉ីនតោននិងទីក្រុងតេហេរ៉ង់ ស្របពេលដែលពួកគេបានព្យាយាមស្វែងរកដំណោះស្រាយ សម្រាប់សង្រ្គាមដែលផ្ទុះឡើងកាលពីថ្ងៃទី២៨ ខែកុម្ភៈ នៅពេល​សហរដ្ឋអាមេរិកនិងអ៉ីស្រាអែល បានរួមដៃគ្នាវាយប្រហារលើប្រទេសអ៉ីរ៉ង់៕