(វ៉ាស៉ីនតោន)៖ សហរដ្ឋអាមេរិក បានប្រកាសពីការចាប់ខ្លួនអតីតមន្រ្តីជាន់ខ្ពស់ម្នាក់នៃទីភ្នាក់ងារចារកម្ម CIA ឈ្មោះ David Rush បន្ទាប់ពីការឆែកឆេរបានរកឃើញ ដុំមាសរាប់រយដុំមានតម្លៃខ្ទង់៤០លានដុល្លារ នៅក្នុងផ្ទះរបស់មន្រ្តីម្នាក់នោះ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃព្រហស្បតិ៍ ទី២៨ ខែឧសភា ឆ្នាំ២០២៦។

ក្រុមប៉ូលិសនៃការិយាល័យស៉ើបអង្កេតសហព័ន្ធ ឬ FBI ក៏បានរឹបអូសផងដែរនូវលុយសុទ្ធចំនួន ២លានដុល្លារ រួមជាមួយនាឡិកាប្រណិតសរុប ៣៥គ្រឿងពីផ្ទះរបស់លោក ដែលស្ថិតនៅរដ្ឋ Virginia ក្នុងខែឧសភានេះ។ ចាប់ពីខែវិច្ឆិកា ឆ្នាំ២០២៥ ដល់ខែមីនា ឆ្នាំ២០២៦នេះ លោក Rush បានដាក់សំណើប៉ុន្មានលើកទៅកាន់ថ្នាក់លើ សុំរូបិយបណ្ណបរទេស​ក្នុងបរិមាណយ៉ាងច្រើន ព្រមទាំងដុំមាសគិតជាតម្លៃរាប់សិបលានដុល្លារ សម្រាប់ការចំណាយផ្សេងៗពាក់ព័ន្ធនឹងការងារ។

លោក Rush ទទួលបានលុយនិងមាស ដោយមិនបានផ្តល់ព័ត៌មានលម្អិតបន្ថែម អំពីមូលហេតុដែលលោកត្រូវការពួកវាទេ។ ក្រោយមក លុយនិងមាសទាំងនោះ ត្រូវបានរកឃើញថា បាត់ចេញពីទូស្តុកទុកនៅកន្លែងធ្វើការ ជាហេតុនាំឱ្យឈានដល់​មានការចុះឆែកឆេរផ្ទះរបស់លោក ហើយក៏រកឃើញដុំមាសប្រហែល៣០៣ដុំ មានតម្លៃប្រហែល៤០លានដុល្លារ។

វាពុំទាន់ច្បាស់ទេថា លោក Rush បានចាកចេញពីទីភ្នាក់ងារ CIA កាលពីពេលណា ប៉ុន្តែរូបលោកត្រូវបានចាប់ខ្លួនកាលពីថ្ងៃទី១៩ ខែឧសភា ហើយចោទប្រកាន់ពីបទលួចលុយរបស់រដ្ឋ។ ការស៉ើបអង្កេតរបស់ FBI ក៏បានរកឃើញដែរថា លោក Rush ថែមទាំងបានផ្តល់ព័ត៌មានក្លែងក្លាយ ស្តីពីប្រវត្តិសិក្សានិងយោធារបស់ខ្លួន នៅក្នុងពាក្យសុំចូលបម្រើការងារទៀតផង៕