(វ៉ាស៉ីនតោន)៖ រដ្ឋមន្រ្តីការបរទេសអាមេរិក លោក Marco Rubio បាននិយាយកាលពីថ្ងៃអង្គារសប្តាហ៍នេះថា លោកប្រធានាធិបតី ដូណាល់ ត្រាំ បានណែនាំដល់ក្រុមអ្នកចរចា ថាមិនឱ្យផ្តល់ការបន្ធូរបន្ថយទណ្ឌកម្មដល់អ៉ីរ៉ង់ ដើម្បីប្តូរជាមួយការបើកច្រកសមុទ្រ Hormuz ហើយថាការដកទណ្ឌកម្មណាមួយ ត្រូវប្រើប្រាស់ជាថ្នូរនឹងកម្មវិធីនុយក្លេអ៊ែររបស់ទីក្រុងតេហេរ៉ង់។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃពុធ ទី៣ ខែមិថុនា ឆ្នាំ២០២៦។

លោក Rubio បានប្រាប់សវនាការព្រឹទ្ធសភា យ៉ាងដូច្នេះថា «ឥឡូវនេះ គ្រប់យ៉ាងដែលត្រូវបានពិភាក្សាជាមួយពួកគេ (អ៉ីរ៉ង់) គឺថាការបន្ធូរបន្ថយទណ្ឌកម្មណាមួយ ត្រូវផ្អែកលើលក្ខខណ្ឌ មានន័យថា វាត្រូវតែជាថ្នូរនឹងហេតុផលដំបូង ដែលនាំឱ្យមានការដាក់ទណ្ឌកម្ម នោះគឺកម្មវិធីនុយក្លេអ៊ែររបស់ពួកគេ»។ លោកបន្ថែមថា «អ៉ីរ៉ង់រងទណ្ឌកម្មដោយសារតែពួកគេ បានចម្រាញ់សារធាតុអ៊ុយរ៉ាញ៉ូមយ៉ាងច្រើន។ អ៉ីរ៉ង់រងទណ្ឌកម្មដោយសារសកម្មភាពនុយក្លេអ៊ែររបស់ពួកគេ។ បើពួកគេយល់ព្រមបោះបង់របស់ទាំងនោះ វានឹងមានការបន្ធូរបន្ថយទណ្ឌកម្ម ដែលពាក់ព័ន្ធការប្តេជ្ញាចិត្ត និងការអនុលោមតាមកិច្ចព្រមព្រៀង»។

គួរបញ្ជាក់ថា នេះគឺជាសក្ខីកម្មក្នុងសភាលើកដំបូង ចាប់តាំងពីសហរដ្ឋអាមេរិកសង្គ្រាមផ្ទុះជាមួយអ៉ីរ៉ង់ ដែលលោក Rubio បាននិយាយពីការបន្ធូរបន្ថយទណ្ឌកម្មសម្រាប់អ៉ីរ៉ង់ ថាលុះត្រាតែពួកគេយល់ព្រមបោះបង់សកម្មភាពនុយក្លេអ៊ែរ៕