(សេអ៊ូល)៖ ក្រសួងដឹកជញ្ជូនកូរ៉េខាងត្បូង បានឱ្យដឹងនាថ្ងៃព្រហស្បតិ៍ ទី៤ ខែមិថុនា ឆ្នាំ២០២៦ ថាកូរ៉េខាងត្បូង និងចិនបានព្រមព្រៀងគ្នា ក្នុងការបង្កើនជើងហោះហើរប្រចាំសប្តាហ៍ រវាងប្រទេសទាំងពីរជាលើកដំបូង ក្នុងរយៈពេល ៧ឆ្នាំ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។

ការព្រមព្រៀងដែលសម្រេចបានក្នុងកិច្ចពិភាក្សាផ្នែកអាកាសចរណ៍ទ្វេភាគី នៅទីក្រុងសេអ៊ូលសប្តាហ៍នេះ នឹងបង្កើនចំនួនជើងហោះហើរដឹកអ្នកដំណើរប្រចាំសប្តាហ៍ ដែលពីមុនមាន ៦០៨ជើង ឱ្យដល់ចំនួន ៦៦៤ជើង រីឯជើងហោះហើរដឹកទំនិញប្រចាំសប្តាហ៍ ដែលពីមុនមាន ៥៤ជើង នឹងកើនដល់ ៦៨ជើង។

ក្រសួងដឹកជញ្ជូនកូរ៉េខាងត្បូង បានឱ្យដឹងទៀតថា ការបន្ថែមជើងហោះហើរមាននៅលើផ្លូវដែលមានតម្រូវការខ្ពស់ ដូចជាពីទីក្រុង Incheon ទៅកាន់ទីក្រុង Shanghai និងពីទីក្រុង Incheon ទៅកាន់ទីក្រុង Guangzhou។ ក្រៅពីនេះ ក៏មានជើងហោះហើរពីអាកាសយានដ្ឋានក្នុងតំបន់របស់កូរ៉េខាងត្បូង រួមទាំងទីក្រុង Busan និង Cheongju ទៅកាន់ទីក្រុងចំនួន១០ របស់ចិន ដូចជា Guangzhou, Chengdu, Shenzhen, Chongqing និង Xian ផងដែរ។

គួរបញ្ជាក់ថា ចរាចរណ៍ដឹកអ្នកដំណើរផ្លូវអាកាសរវាងកូរ៉េខាងត្បូង និងចិន នៅក្នុងត្រីមាសទីមួយនៃឆ្នាំ២០២៦ បានឈានដល់ប្រហែល ៤.៣៩លាននាក់៕