(ប៉េកាំង)៖ នាថ្ងៃព្រហស្បតិ៍ ទី៤ ខែមិថុនា ឆ្នាំ២០២៦ ចិនបាននិយាយថា ខ្លួនបានដាក់បម្រាមធ្វើដំណើរទៅលើសមាជិកសភា៤រូប នៃប្រទេសនូវែលសេឡង់ ដោយសារតែការបំពេញទស្សនកិច្ចនៅតៃវ៉ាន់ ដែលមានផលប៉ះពាល់នយោបាយធ្ងន់ធ្ងរ ហើយស្មើទៅនឹងការលូកលាន់ជ្រៀតជ្រែកកិច្ចការផ្ទៃក្នុង។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ស្ថានទូតចិននៅទីក្រុងវែលីងតោន បាននិយាយថា សមាជិកសភានូវែលសេឡង់ទាំង៤រូប បានចចេសធ្វើដំណើរទៅកោះតៃវ៉ាន់កាលពីខែឧសភា ជាទីដែលពួកគេបានជួបជាមួយ មេដឹកនាំរងតៃវ៉ាន់ លោកស្រី Hsiao Bi-khim ទោះបីមានការព្រមានជាមុនម្តងហើយម្តងទៀតយ៉ាងណាក៏ដោយ។ ជាលទ្ធផល ពួកគេនឹងត្រូវហាមឃាត់មិនឱ្យជាន់ទឹកដីប្រទេសចិនឡើយ។ អ្នកនាំពាក្យស្ថានទូតចិន បានបន្ថែមថា «ភាគីនូវែលសេឡង់មិនគួរភ្ញាក់ផ្អើលចំពោះរឿងនេះទេ ព្រោះអ្នកដែលហ៊ានឈានជើងឆ្លងបន្ទាត់ក្រហម ស្តីពីបញ្ហាតៃវ៉ាន់ នឹងត្រូវប្រឈមមុខជាមួយផលវិបាក។

នូវែលសេឡង់បានសម្តែងក្តីបារម្ភ ជុំវិញការដាក់បម្រាមរបស់ទីក្រុងប៉េកាំង ហើយបានអះអាងថា សមាជិកសភារបស់ខ្លួនកន្លងមក ធ្លាប់ធ្វើទស្សនកិច្ច​ទៅកាន់តៃវ៉ាន់ អស់រយៈពេលច្រើនទសវត្សរ៍មកហើយ។

ចំណែកតៃវ៉ាន់ក៏បានបញ្ចេញប្រតិកម្មរិះគន់ផងដែរ ជុំវិញរឿងនេះ។ ទីក្រុងតៃប៉ិបាននិយាយថា តៃវ៉ាន់និងចិនគឺគ្មានភាគីណាមួយ ជាចំណុះរបស់ភាគីម្ខាងទៀតនោះទេ ហើយការធ្វើប្រាស្រ័យទាក់ទងរបស់ដែនកោះនេះ ជាមួយប្រទេសដទៃដែលជាមិត្ត គឺជាសិទ្ធិស្របច្បាប់របស់ភាគីទាំងពីរ ហើយចិនមិនមានសិទ្ធិអ្វី​មកជ្រៀតជ្រែកឡើយ៕