(ហ្សាការតា)៖ ទីភ្នាក់ងារប្រឆាំងអំពើពុករលួយឥណ្ឌូណេស៉ី បានចាប់ខ្លួនអនុរដ្ឋមន្រ្តីទទួលបន្ទុកកិច្ចការអន្តោប្រវេសន៍ ដែលជាការចាប់ខ្លួនលើមន្រ្តីជាន់ខ្ពស់ទីពីរហើយ ក្នុងរយៈពេល ២ថ្ងៃ ពាក់ព័ន្ធបញ្ហាអំពើពុករលួយ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃព្រហស្បតិ៍ ទី៤ ខែមិថុនា ឆ្នាំ២០២៦។

អ្នកនាំពាក្យទីភ្នាក់ងារប្រឆាំងអំពើពុករលួយឥណ្ឌូណេស៉ី លោក Budi Prasetyo បាននិយាយថា អនុរដ្ឋមន្រ្តីទទួលបន្ទុកកិច្ចការអន្តោប្រវេសន៍ លោក Silmy Karim ត្រូវចាប់ខ្លួនពីបទសង្ស័យប្រព្រឹត្តអំពើពុករលួយ ក្នុងការគ្រប់គ្រងឯកសារអន្តោប្រវេសន៍។

លោក Silmy ត្រូវបានសួរចម្លើយនៅឯការិយាល័យគណបក្ស KPK កាលពីយប់ថ្ងៃពុធ ហើយប្រហែល ១០ម៉ោងក្រោយ នាព្រឹកថ្ងៃព្រហស្បតិ៍នេះ លោកត្រូវប៉ូលិសវាយខ្នោះ និងពាក់អាវពណ៌ទឹកក្រូច ដែលសម្គាល់ថាលោកគឺជនសង្ស័យ។ លោក​ត្រូវ​បាន​គេ​បញ្ជូន​ទៅ​ទីតាំង​ឃុំ​ខ្លួន។

តាមលោក Budi អំពើពុករលួយដែលបានចោទប្រកាន់លើលោក Silmy កើតឡើងនៅឆ្នាំ២០២៣ ដល់ឆ្នាំ២០២៤។ លោក Silmy បានកាន់តួនាទីជាអគ្គនាយកសម្រាប់កិច្ចការអន្តោប្រវេសន៍ ក្រោមការដឹកនាំរបស់អតីតប្រធានាធិបតី លោក Joko Widodo អំឡុងពេលនោះ។

គួរបញ្ជាក់ថា ការចាប់ខ្លួនខាងលើធ្វើឡើង មួយថ្ងៃបន្ទាប់ពីការិយាល័យអគ្គរដ្ឋអាជ្ញាឥណ្ឌូណេស៉ី បានឃាត់ខ្លួន លោក Dadan Hindayana ដែលជាអតីតប្រធានទីភ្នាក់ងារមួយ ដែលមើលការខុសត្រូវកម្មវិធីផ្តល់អាហារឥតគិតថ្លៃ របស់ប្រធានាធិបតី លោក Prabowo Subianto។ លោក Dadan មានឈ្មោះជាជនសង្ស័យ ក្នុងសំណុំរឿងពុករលួយពាក់ព័ន្ធបញ្ហាអភិបាលកិច្ចនិងលទ្ធកម្មនៃកម្មវិធីនោះ៕