(ណៃរ៉ូប៊ី)៖ ប្រធានាធិបតីនៃប្រទេសកេនយ៉ា លោក William Ruto បាននិយាយថា រដ្ឋាភិបាលរបស់លោកបាននិងកំពុងធ្វើរឿងត្រឹមត្រូវ ដោយអនុញ្ញាតឱ្យសហរដ្ឋអាមេរិក ដំឡើងទីតាំងធ្វើចត្តាឡីស័ក្តអ្នកជំងឺអេបូឡា នៅក្នុងប្រទេសកេនយ៉ា។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃសុក្រ ទី៥ ខែមិថុនា ឆ្នាំ២០២៦។

អំឡុងទស្សនកិច្ចទៅកាន់ប្រទេសអាហ្រ្វិកខាងត្បូង លោក Ruto ប្រាប់ក្រុមអ្នកសារព័ត៌មានដូច្នេះថា «ខ្ញុំ​អាច​និយាយ​​បាន​ដោយ​មិន​ខ្លាច​រអា ថា​យើង​កំពុង​ធ្វើ​រឿងត្រឹមត្រូវ។ វាមិនសមទាល់តែសោះ បើអាមេរិកគ្រាន់តែស្នើទីតាំងនោះ ដើម្បីទុកសម្រាប់ជនជាតិរបស់ខ្លួន ហើយយើងបដិសេធនោះ»។

ទីតាំងចត្តាឡីស័ក្តក្នុងទីក្រុង Nanyuki ដែលស្ថិតនៅទីប្រជុំជនភាគកណ្តាលប្រទេសកេនយ៉ា មានរៀបចំគ្រែចំនួន ៥០ សម្រាប់ជនជាតិអាមេរិកដែលប្រឈមនឹងការឆ្លងវីរុស ពីកន្លែងផ្ទុះរាលដាលជំងឺអេបូឡា នៅសាធារណរដ្ឋប្រជាធិបតេយ្យកុងហ្គោ។

ការតវ៉ាប្រឆាំងនឹងទីតាំងនេះ បានបណ្តាលឱ្យមានមនុស្សពីរនាក់ស្លាប់ កាលពីសប្តាហ៍មុន។ ដំបូងឡើយ តុលាការកេនយ៉ា បានបង្គាប់ឱ្យផ្អាកការងារដំឡើងនេះសិន ប៉ុន្តែស្ថានទូតអាមេរិកប្រចាំទីក្រុងណៃរ៉ូប៊ី ថាកំពុងធ្វើការជាមួយរដ្ឋាភិបាលកេនយ៉ា ដើម្បីដោះស្រាយការជំទាស់៕