(ប៉េកាំង)៖ រដ្ឋមន្ត្រីការបរទេសចិន លោក វ៉ាង យី នៅថ្ងៃសុក្រនេះ បានជួបពិភាក្សាការងារជាមួយរដ្ឋមន្ត្រីការបរទេសមីយ៉ាន់ម៉ា លោក ទីន ម៉ោង ស្វេ (Tin Maung Swe) នៅក្នុងរដ្ឋធានីប៉េកាំង ដោយបានបញ្ជាក់ពីការគាំទ្ររបស់ចិនចំពោះរដ្ឋាភិបាលថ្មីរបស់មីយ៉ាន់ម៉ា។ នេះបើតាមការចេញផ្សាយដោយទីភ្នាក់ងារសារព័ត៌មានចិន Xinhua។

លោក វ៉ាង យី បានបញ្ជាក់ថា ចិនត្រៀមខ្លួនរួចជាស្រេចក្នុងការធ្វើការងារជាមួយរដ្ឋាភិបាលថ្មី ដើម្បីពង្រឹងទំនាក់ទំនងកម្រិតខ្ពស់ និងបង្កើនទំនុកចិត្តនយោបាយទៅវិញទៅមក សំដៅកសាងសហគមន៍ជោគវាសនារួមចិន-មីយ៉ាន់ម៉ា។ ប្រមុខការបរទេសចិនរូបនេះ បានសង្កត់ធ្ងន់ពីការគោរពគោលការណ៍មិនជ្រៀតជ្រែកកិច្ចការផ្ទៃក្នុង និងគាំទ្រដល់ដំណើរការស្វែងរកសន្តិភាពក្នុងស្រុករបស់មីយ៉ាន់ម៉ា។ បន្ថែមពីនេះ ភាគីទាំងពីរក៏បានប្តេជ្ញារួមគ្នាប្រយុទ្ធប្រឆាំងនឹងឧក្រិដ្ឋកម្មឆ្លងដែន ដូចជាល្បែងអនឡាញ និងការឆបោកតាមទូរគមនាគមន៍ផងដែរ។

ជាការឆ្លើយតប លោក ទីន ម៉ោង ស្វេ បានអះអាងសាជាថ្មីពីការគាំទ្រយ៉ាងរឹងមាំចំពោះគោលការណ៍ «ចិនតែមួយ» និងគំនិតផ្តួចផ្តើមសកលរបស់ចិន។ លោកបានបញ្ជាក់ថា មីយ៉ាន់ម៉ាស្វាគមន៍ជានិច្ចចំពោះអ្នកវិនិយោគចិន និងមានបំណងពង្រឹងការកសាងច្រករបៀងសេដ្ឋកិច្ចមីយ៉ាន់ម៉ា-ចិន ព្រមទាំងការគាំទ្រគ្នាទៅវិញទៅមកនៅលើវេទិកាអន្តរជាតិ ដូចជាអង្គការសហប្រជាជាតិ និងអាស៊ានជាដើម៕