(ប៉េកាំង)៖ ក្រុង Yiwu ដែលស្ថិតនៅភាគកណ្តាលនៃខេត្ត ជឺជាំង ប្រទេសចិន ជាកន្លែងដែលគ្មានអំណោយផល ពីធនធានធម្មជាតិដ៏សម្បូរបែប ឬឧត្តមភាពផ្នែកទីតាំងភូមិសាស្ត្រនោះទេ ពោលគឺមិនមែនជាទីក្រុងកំពង់ផែ មិនស្ថិតនៅក្បែរទីរួមខេត្ត មិននៅជាប់នឹងព្រំដែន ឯផ្ទៃដីដាំដុះគិតជាមធ្យមក្នុងមនុស្សម្នាក់ៗមានទំហំមិនដល់០,០៣ ហិកតា តាំងពីដើមមកមិន ដែលត្រូវបានចាត់ទុកជាកន្លែងសម្បូរហូរហៀរនៅខេត្ត ជឺជាំង នោះទេ។ ប៉ុន្តែបច្ចុប្បន្ននេះ ពេលនិយាយដល់ក្រុងYiwu មិនត្រឹមតែជនជាតិចិនប៉ុណ្ណោះទេ សូម្បីពាណិជ្ជករនៃប្រទេសជាច្រើនក៏ស្គាល់ច្បាស់ពីទីក្រុងដ៏តូចមួយនេះដែរ ហើយលើកមេដៃកោតសរសើរព្រមៗគ្នាចំពោះការអភិវឌ្ឍនៃទីក្រុងនេះ។

ក្នុងឆ្នាំ២០២៥ ទំហំនាំចេញ-នាំចូលសរុបរបស់ក្រុង Yiwu ត្រូវជា៨៣៦.៥ ប៊ីលានយាន់ប្រាក់ចិន ហើយនៅត្រីមាសទី១ ឆ្នាំ២០២៦ ទំហំនាំចេញ-នាំចូលសរុបរបស់ក្រុង Yiwu ត្រូវជា២០៩.៣ ប៊ីលានយាន់ប្រាក់ចិន កើនឡើង២៥% បើប្រៀបធៀបនឹងរយៈពេលដូចគ្នា នៃឆ្នាំ២០២៥ ដែលបានបង្កើតកំណត់ត្រាថ្មីក្នុងប្រវត្តិសាស្ត្រ។

មូលហេតុអ្វីទៅដែលនាំឱ្យទីក្រុង ដែលមិនប្រកបដោយលក្ខណសម្បត្តិពិសេសអ្វីសោះ ហើយពីមុនក៏គ្មានសេដ្ឋវិទូណាម្នាក់ ដែលយល់ឃើញថាអាចអភិវឌ្ឍបានល្អ បែរជាក្លាយទៅជាមជ្ឈមណ្ឌលពាណិជ្ជកម្មរបស់ខេត្ត ជឺជាំង បែបនេះ?

ជាបឋម យើងមកស្វែងយល់ពីពេលវេលា នៃការលេចចេញជារូបរាងនៃ«ផ្សារផលិតផលតូច» (small commodities) របស់ក្រុងYiwu។ រូបរាងដំបូងនៃ «ផ្សារផលិតផលតូច» ក្រុង Yiwu គឺផ្តើមចេញពីការដោះដូរអីវ៉ាន់គ្នា ក្នុងនោះ ការ «យកស្ករដូរជាមួយរោមមាន់»ជារបៀបដោះដូរគ្នាដ៏ពេញនិយមបំផុតក្នុងជំនាន់ទសវត្សរ៍ឆ្នាំ៧០-៨០ ពោលគឺឈ្មួញស្ករយកស្ករក្រហម ទៅដូរយករោមមាន់របស់ អ្នកភូមិដើម្បីយកទៅធ្វើជាជីសម្រាប់ដាក់ស្រែចម្ការ។ ឯការលក់ដូរទៀតសោត គឺចល័តតាមចិញ្ចើមផ្លូវ។ លុះដល់ឆ្នាំ១៩៨២ គណៈកម្មការបក្សប្រចាំស្រុក Yiwu បានដាក់ចេញសេចក្តីសម្រេចចិត្តដ៏កម្រមួយ ពោលគឺបើកឱ្យមាន «ផ្សារផលិតផលតូច»ដោយបានសង់រោងឱ្យអាជីវករខ្នាតតូចលក់ដូរទំនិញកំប៉ិកកំប៉ុកគ្រប់ប្រភេទ។ អ្វីដែលគួរបញ្ជាក់គឺថា កាលពីជំនាន់នោះ ពាក្យថា «សេដ្ឋកិច្ចទីផ្សារ» ជារឿងចម្លែកសម្រាប់មនុស្សទូទៅ ដូច្នេះការអនុញាតឱ្យមាន«ផ្សារផលិតផលតូច» គឺតម្រូវឱ្យ អ្នកសម្រេចចិត្តខាងគោលនយោបាយមានទំនួលខុសត្រូវខ្ពស់ និងមានសេចក្តីក្លាហានក្នុងការសម្រេចចិត្ត។

ស្របនឹងការអភិវឌ្ឍខ្លាំងឡើងៗនៃទីផ្សារ ការអភិវឌ្ឍនៃ «ផ្សារផលិតផលតូច» របស់ក្រុង Yiwu ត្រូវបង្អង់ល្បឿន ដោយសារជួបនឹងបញ្ហាមួយចំនួន។ លុះដល់ឆ្នាំ២០០៦ ខណៈពេលដែលលោក ស៊ី ជីនភីង ដែលកាលនោះមានមុខតំណែង ជាលេខាធិការបក្សខេត្ត ជឺជាំង បានអញ្ជើញចុះត្រួតពិនិត្យនិងស្វែងយល់ការងារនៅក្រុង Yiwu ក៏សង្កេតឃើញពីបញ្ហា ដែលរាំងស្ទះដល់ការអភិវឌ្ឍរបស់ក្រុង Yiwu ពោលគឺគ្មានការគាំទ្រពីគោលនយោបាយថ្មី។ លោកបានលើកឧទាហរណ៍ថា ការអភិវឌ្ឍ «ផ្សារផលិតផលតូច» របស់ក្រុង Yiwu គឺដូចជា «ការដូរសម្លៀកបំពាក់ថ្មីដែលធំល្មមឱ្យកូនក្មេង ព្រោះកូនក្មេងធំធាត់លឿនណាស់ បើនៅតែស្លៀកសម្លៀកបំពាក់ចាស់ដដែលៗ វានឹងតឹងចង្អៀត ហើយរារាំងដល់ការលូតលាស់របស់ក្មេងៗ។ ឯទីផ្សារដែលកំពុងអភិវឌ្ឍខ្លាំង បើគោលនយោបាយតាមមិនទាន់ទេ វាក៏នឹងរារាំងដល់ការវិវឌ្ឍរីកចម្រើនដែរ»។

អនុសាសន៍របស់លោក ស៊ី ជីនភីង ជាការចង្អុលបង្ហាញទិសដៅសម្រាប់ការបង្កើតជា«បទពិសោធអភិវឌ្ឍន៍Yiwu » ដែលជាមូលដ្ឋានគ្រឹះនៃការអភិវឌ្ឍរបស់ក្រុងYiwu ក្នុងយុគសម័យថ្មី។ រដ្ឋបាលខេត្ត ជឺជាំង បានធ្វើប្រតិភូកម្មសិទ្ធិអំណាច ដែលមិនធ្លាប់មានទៅឱ្យក្រុង Yiwu ដើម្បីអភិវឌ្ឍដោយស្វ័យភាព។ រដ្ឋបាលផ្តល់ការគាំទ្រខាងគោលនយោបាយ ចំណែកអាជីវករខិតខំច្នៃប្រឌិតផលិតផលថ្មីៗ ពោលគឺ«បើគ្មានត្រូវបង្កើតឱ្យមាន» និងកែច្នៃរបស់មិនបានការឱ្យទៅជា ផលិតផលដែលអាចលក់ដូរបាន។

ក្រុង Yiwu ហ៊ានធ្វើហ៊ានសាកល្បង រូបមន្ត«ត្រួតពិនិត្យរួចសឹមដាក់កេស»របស់គយក្រុងYiwu បានលើកកម្ពស់ ប្រសិទ្ធភាពនៃការនាំចេញទំនិញច្រើនប្រភេទដែលដាក់លាយឡំគ្នាក្នុងកេសតែមួយ ពោលគឺទំនិញស្របតាមស្តង់ដាទើបអនុញ្ញាតឱ្យ ដាក់កុងតឺន័រនាំចេញ ដែលបានកាត់បន្ថយការបង្វិលទំនិញត្រឡប់មកវិញពីសំណាក់គយបរទេស។

រូបមន្តមួយនេះក៏ត្រូវបានអនុវត្តនៅទីផ្សារជាង៣០ ទូទៅប្រទេសចិន ដែលធ្វើឱ្យការនាំចេញទំនិញតូចៗកាន់តែងាយស្រួលនិងឆាប់រហ័ស។
«បទពិសោធអភិវឌ្ឍន៍ Yiwu» គឺការធ្វើកំណែទម្រង់ឥតឈប់ឈរ ស្របនឹងការវិវឌ្ឍរីកចម្រើននៃធុរកិច្ចអេឡិចត្រូនិក ជាពិសេសធុរកិច្ចអេឡិចត្រូនិកឆ្លងដែន ការលក់ទំនិញតាមអនឡាញបានផ្លាស់ប្តូរបែបផែនលក់ដូរបែបប្រពៃណី។ ផលិតផលច្នៃប្រឌិត ខាងវប្បធម៌និងសម្ភារៈសិក្សាដែលជា «ម៉ាកផលិតផលប្រពៃណី» របស់ក្រុងYiwu ជាទំនិញដ៏ពេញនិយមបានបង្ហាញវត្តមាន ក្នុងទីផ្សារបរទេស ដែលមិនត្រឹមតែបង្ហាញពីមុខមាត់និងភាពទាក់ទាញនៃ «Made in China» ប៉ុណ្ណោះទេ ប៉ុន្តែក៏ជាការរំលេច ពីវប្បធម៌ចិនផងដែរ។

២០ ឆ្នាំបន្ទាប់ពីការលើកឡើងនូវ «បទពិសោធអភិវឌ្ឍន៍ Yiwu» ទំហំពាណិជ្ជកម្មនៃ «ផ្សារផលិតផលតូច» របស់ក្រុង Yiwu បានកើនពី៣១.៥ ប៊ីលានយាន់ប្រាក់ចិនឡើងដល់ជាង៣២២.៣ ប៊ីលានយាន់ប្រាក់ចិននៅឆ្នាំ២០២៥ ឯទំហំនាំចេញនាំចូល ស្ថិតនៅលេខរៀងទីមួយក្នុងចំណោមតំបន់រដ្ឋបាលថ្នាក់ស្រុក/ក្រុង/ខណ្ឌទូទាំងប្រទេសចិន។ អ្វីដែលគួរបញ្ជាក់គឺថា គោលនយោបាយ របស់រដ្ឋបាលក្រុងYiwu មិនត្រឹមតែមានអំណោយផលដល់ប្រជាជនក្នុងតំបន់ប៉ុណ្ណោះទេ ប៉ុន្តែក៏ជាកាលានុវត្តភាព សម្រាប់ជនបរទេសផងដែរ។ ជនបរទេសជាច្រើនបានចាប់យកឱកាសទៅវិនិយោគនិងធ្វើអាជីវកម្មនៅទីនោះ សឹងតែមានអ្នកខ្លះរស់នៅទីនោះអស់ដប់ម្ភៃឆ្នាំទៀតផង។

ការវិវឌ្ឍរីកចម្រើនពីផ្សារតាមចិញ្ចើមផ្លូវដល់ មជ្ឈមណ្ឌលលក់ដូរផលិតផលតូចៗ ដែលមានទ្រង់ទ្រាយធំបំផុតលើ ពិភពលោក បច្ចុប្បន្នក្រុង Yiwu មានអ្នកប្រកបអាជីវកម្មជាង១.២៦ លានគ្រួសារ លក់ដូរផលិតផលជាង២.១ លានប្រភេទ និងមានទំនាក់ទំនងពាណិជ្ជកម្ម ជាមួយប្រទេសនិងតំបន់ជាង២៣០ លើពិភពលោក ជាពិសេសបានផ្តល់ឱកាសការងារ​សម្រាប់ប្រជាជនទូទាំងប្រទេសលើសពី៣២ លាននាក់។

គន្លឹះជោគជ័យនៃ «ផ្សារផលិតផលតូច Yiwu» គឺរដ្ឋបាលនិងសហគ្រាស/អាជីវករធ្វើការជាមួយគ្នា ពោលគឺការធ្វើពាណិជ្ជកម្ម ដែលមានការគាំទ្រពីគោលនយោបាយដ៏ត្រឹមត្រូវ ដែលសមស្របតាមលក្ខខណ្ឌក្នុងតំបន់ នឹងធ្វើឱ្យសេដ្ឋកិច្ចឯកជនអភិវឌ្ឍ ក្រោមបរិយាកាសប្រកបដោយសេរីភាព បទដ្ឋាននិងទីផ្សារភាវូបនីយកម្ម។ «បទពិសោធអភិវឌ្ឍន៍ Yiwu» មិនមែនជារូបមន្តថេរនោះទេ តែជាការធ្វើកំណែទម្រង់តាមលក្ខខណ្ឌជាក់ស្តែង ដើម្បីដើរឱ្យទាន់តម្រូវការនៃយុគសម័យ ទើបអាចសម្រេចគោលដៅវិបុលភាព សម្រាប់ទាំងអស់គ្នា៕

អត្ថបទដោយ៖ លោក តាំង ស៊ីឡេង , បុគ្គលិកវិទ្យុមិត្តភាពកម្ពុជា-ចិន