បទវិភាគ៖ ឆ្លងកាត់រយៈពេល៦៥ឆ្នាំ៖ សហគមន៍ជោគវាសនារួមចិន-ឡាវ «គ្រប់រដូវកាល» បានឡើងដល់កម្រិតថ្មីទៀត
08-06-2026 16:54
(ប៉េកាំង)៖ "ការកសាងសហគមន៍ជោគវាសនារួមចិន-ឡាវឈានទៅរកកម្រិតកាន់តែខ្ពស់" "ឡាវរំពឹងថានឹងដកស្រង់បទពិសោធអភិវឌ្ឍន៍ពីប្រទេសចិន"ល។ល ទាក់ទងនឹងដំណើរទស្សនកិច្ចផ្លូវរដ្ឋរបស់លោក Thongloun Sisoulith អគ្គលេខាធិការនៃគណៈកម្មាធិការមជ្ឈិមបក្សប្រជាជនបដិវត្តន៍ឡាវនិងជាប្រធានរដ្ឋឡាវនៅប្រទេសចិនពីថ្ងៃទី២ ដល់ថ្ងៃទី៦ខែមិថុនា ប្រទេសទាំងពីរចិននិងឡាវព្រមទាំងមតិអន្តរជាតិបាននាំគ្នាវាយតម្លៃយ៉ាងសកម្ម។ ក្នុងអំឡុងពេលដំណើរទស្សនកិច្ចលើកនេះ ថ្នាក់ដឹកនាំកំពូលនៃបក្សនិងរដ្ឋ នៃប្រទេសទាំងពីរបានឯកភាពគ្នាជំរុញឱ្យទំនាក់ទំនងចិន-ឡាវសម្រេចបាននូវការលោតផ្លោះថ្មី ដោយពួតដៃគ្នាកសាងសហគមន៍ជោគវាសនារួមចិន-ឡាវគ្រប់រដូវកាលក្នុងយុគសម័យថ្មី ។ ឥស្សរជនវិភាគបានសម្គាល់ឃើញថា នេះនឹងជំរុញយ៉ាងខ្លាំងដល់ទំនាក់ទំនងចិន-ឡាវ និងបុព្វហេតុទំនើបកម្មដែលមានលក្ខណៈពិសេសរៀងៗខ្លួនឱ្យឈានចូលដំណាក់កាលថ្មី ដើម្បីធ្វើជាគំរូសម្រាប់ការកសាងសហគមន៍ជោគវាសនារួមសម្រាប់មនុស្សជាតិផងដែរ។
ដំណើរទស្សនកិច្ចរបស់លោក Thongloun Sisoulith នៅប្រទេសចិនលើកនេះធ្វើឡើងចំពេលខួបទី៦៥ឆ្នាំ នៃការបង្កើតទំនាក់ទំនងការទូតចិន-ឡាវនិងជា"ឆ្នាំមិត្តភាពចិន-ឡាវ"ដែលមានសារសំខាន់ណាស់ ។ ចាប់តាំងពីការបើកឱ្យដំណើរការខ្សែរថភ្លើងចិន-ឡាវដែលជួយជំរុញការអភិវឌ្ឍសេដ្ឋកិច្ចរបស់ប្រទេសទាំងពីរនិងតំបន់ រហូតដល់ "គម្រោងធំទាំង៨ជាជំនួយរបស់ភាគីចិនចំពោះឡាវ" ដែលបានផ្តល់ផលប្រយោជន៍ដល់ប្រជាជនជាបន្តបន្ទាប់ សុទ្ធតែជាសក្ខីភាពនៃប្រសិទ្ធភាព នៃការកសាងសហគមន៍ជោគវាសនារួមចិន-ឡាវ ។
ក្នុងស្ថានការណ៍ថ្មី តើត្រូវជំរុញទំនាក់ទំនងចិន-ឡាវ និងការកសាងសហគមន៍ជោគវាសនារួមនៃប្រទេសទាំងពីរ ឱ្យឈានទៅរកស្តង់ដារខ្ពស់ គុណភាពខ្ពស់និងកម្រិតខ្ពស់តាមរបៀបណា?
ការកសាងទំនុកចិត្តខាងនយោបាយគឺជាមូលដ្ឋានគ្រឹះ ។ ជានិច្ចកាល ភាគីចិនតែងតែចាត់ទុកឡាវជាទិសដៅសំខាន់ក្នុងគោលនយោបាយការទូតជាមួយប្រទេសជិតខាង និងគាំទ្រយ៉ាងមុតមាំឱ្យឡាវដើរតាមផ្លូវសង្គមនិយមដែលសមស្របសភាពការណ៍ជាតិរបស់ខ្លួន ។ ភាគីឡាវបានថ្លែងថា គោរពយ៉ាងមុតមាំជានិច្ចនូវគោលការណ៍ចិនមួយ និងគាំទ្រគំនិតផ្តួចផ្តើមសកលដ៏សំខាន់មួយចំនួនដែលលើកឡើងដោយលោក Xi Jinping អគ្គលេខាធិការនៃគណៈកម្មាធិការមជ្ឈិមបក្សកុម្មុយនីស្តចិន ។
ការធ្វើឱ្យស៊ីជម្រៅនូវកិច្ចសហប្រតិបត្តិការប្រកបដោយគុណភាពខ្ពស់ ដែលផ្តល់ផលប្រយោជន៍ដល់គ្នាទៅវិញទៅមក គឺជាអត្ថន័យដែលគួរតែមានក្នុងការលើកកម្ពស់ការកំណត់ទម្រង់នៃទំនាក់ទំនងទ្វេភាគីចិន-ឡាវ ។ បច្ចុប្បន្ននេះ ចិនជាប្រទេសវិនិយោគធំទីមួយនិងជាដៃគូពាណិជ្ជកម្មធំទីពីររបស់ឡាវ ។ នៅឆ្នាំ២០២៥ ទំហំពាណិជ្ជកម្មទ្វេភាគីបានឡើងដល់៩,៨២ពាន់លានដុល្លារអាមេរិកដែលកើនឡើង១៩,៣% បើប្រៀបធៀបនឹងឆ្នាំ២០២៤។ ក្នុងនាមជាគម្រោងជានិមិត្តសញ្ញានៃការរួមគ្នាកសាង"ខ្សែក្រវាត់និងផ្លូវ" ចាប់ពីបានដាក់ឱ្យដំណើរការអស់រយៈពេលជាង៤ឆ្នាំមក ផ្លូវដែកចិន-ឡាវបានបើកបររថភ្លើងដឹកអ្នកដំណើរសរុបជាង ១សែនជើង ដឹកជញ្ជូនអ្នកដំណើរសរុបលើសពី៧៣លាននាក់ និងដឹកទំនិញសរុបជាង៨៤លានតោន ដែលបានក្លាយជា"ច្រកមាស"សម្រាប់កិច្ចសហប្រតិបត្តិការឈ្នះ-ឈ្នះរវាងចិននិងឡាវនិងជំរុញការអភិវឌ្ឍសេដ្ឋកិច្ចក្នុងតំបន់។
ក្នុងអំឡុងពេលដំណើរទស្សនកិច្ចនៅប្រទេសចិន លោកThongloun Sisoulith បានទស្សនាការបង្ហាញសមត្ថភាពនិងជំនាញរបស់មនុស្សយន្តនៅទីក្រុង Hangzhou ខេត្ត Zhejiang និងសាកល្បងប្រតិបត្តិមនុស្សយន្តបួនជើង ។ នៅក្រុងប៉េកាំង លោកបានទស្សនាវិទ្យាស្ថានស្រាវជ្រាវបច្ចេកវិទ្យាអវកាសរបស់ចិន ដើម្បីស្វែងយល់ពីសមិទ្ធផលអភិវឌ្ឍន៍ ខាងវិទ្យាសាស្ត្រនិងបច្ចេកវិទ្យាអវកាសរបស់ចិន ។ ប្រព័ន្ធសារព័ត៌មានឡាវបានយល់ឃើញថា នេះបានបង្ហាញថា ឧស្សាហកម្មច្នៃប្រឌិតថ្មីនិងការកសាងឌីជីថលូបនីយកម្មមានឋានៈកាន់តែសំខាន់ក្នុងកិច្ចសហប្រតិបត្តិការទ្វេភាគីចិន-ឡាវ។
នាបច្ចុប្បន្ននេះ ទំនាក់ទំនងចិន-ឡាវកំពុងស្ថិតក្នុងដំណាក់កាលដ៏ល្អបំផុតក្នុងប្រវត្តិសាស្ត្រ ហើយកំពុងបើកចំហនូវទស្សនវិស័យអភិវឌ្ឍន៍ដ៏ធំធេង ។ ទន្ទឹមនឹងការកសាងសហគមន៍ជោគវាសនារួមចិន-ឡាវគ្រប់រដូវកាល ក្នុងយុគសម័យថ្មីដំណើរការកាន់តែស៊ីជម្រៅនិងកាន់តែរឹងមាំ ការអភិវឌ្ឍរបស់ប្រទេសទាំងពីរនឹងទទួលបានកាលានុវត្តភាពថ្មី សន្តិភាពនិងវិបុលភាពក្នុងតំបន់ នឹងទទួលបានកម្លាំងចលករថ្មី ហើយមិត្តភាពប្រពៃណីដែលជា "អ្នកជិតខាងល្អ មិត្តភក្តិល្អ សមមិត្តល្អនិងដៃគូល្អ" ក៏នឹងបើកទំព័រប្រវត្តិសាស្រ្តថ្មីដ៏ត្រចះត្រចង់ផងដែរ៕
វិទ្យុមិត្តភាពកម្ពុជាចិន
