(អាដែន)៖ ក្រុមឧទ្ទាមហ៊ូធី (Houthis) នៅប្រទេសយេម៉ែន ដែលគាំទ្រដោយអ៊ីរ៉ង់ បានប្រកាសនៅថ្ងៃចន្ទថា ពួកគេនឹងហាមឃាត់មិនឱ្យនាវាពាណិជ្ជកម្មរបស់អ៊ីស្រាអែលធ្វើដំណើរឆ្លងកាត់សមុទ្រក្រហមនោះឡើយ ដែលនេះជាការបន្ថែមបន្ទុកកាន់តែធ្ងន់ធ្ងរដល់ខ្សែចង្វាក់ដឹកជញ្ជូនសកល។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ក្រុមហ៊ូធីបានបញ្ជាក់ថា ខ្លួនបានបើកការវាយប្រហារលើអ៊ីស្រាអែល និងបានដាក់បម្រាមទាំងស្រុងលើនាវាអ៊ីស្រាអែលនៅសមុទ្រក្រហម។ ប្រភពពីក្រុមនេះបានព្រមានថា ការរារាំងនេះគ្រាន់តែជាជំហានដំបូងប៉ុណ្ណោះ ហើយពួកគេអាចនឹងឈានដល់ការរារាំងរាល់នាវាបរទេសណាដែលធ្វើដំណើរឆ្ពោះទៅកាន់អ៊ីស្រាអែលបន្ថែមទៀត។ ការគំរាមកំហែងនេះបានធ្វើឱ្យទីផ្សារថាមពលពិភពលោកកាន់តែមានក្តីបារម្ភ ខណៈដែលច្រកសមុទ្រហ័រមូស ត្រូវបានអ៊ីរ៉ង់បិទខ្ទប់អស់រយៈពេលជាង ៣ខែមកហើយ។

គួររំលឹកថា កាលពីមានសង្គ្រាមនៅតំបន់ហ្គាហ្សាឆ្នាំ២០២៣ ការវាយប្រហាររបស់ក្រុមហ៊ូធីនៅសមុទ្រក្រហម បានបង្ខំឱ្យក្រុមហ៊ុនដឹកជញ្ជូនយក្សដូចជា Maersk និង Hapag-Lloyd បង្វែរទិសដៅនាវាឱ្យបើកវាងទ្វីបអាហ្វ្រិក ដែលខាតទាំងពេល និងថវិកា។ ទោះជាយ៉ាងណា ផលប៉ះពាល់នៅពេលនេះគឺមានទំហំធំធេងជាងមុនឆ្ងាយណាស់ ដោយសារតែការបិទច្រកសមុទ្រហ័រមូស បានធ្វើឱ្យអារ៉ាប៊ីសាអូឌីតត្រូវបង្ខំចិត្តនាំចេញប្រេងតាមរយៈចំណតនៅសមុទ្រក្រហមនេះជំនួសវិញ ខណៈដែលអេមីរ៉ាតអារ៉ាប់រួមក៏កំពុងជួបការលំបាកក្នុងការនាំចេញដូចគ្នា ដោយសាររងការវាយប្រហារពីសំណាក់អ៊ីរ៉ង់៕