(ហ៊្សេរុយសាឡិម)៖ នាថ្ងៃចន្ទ ទី១៥ ខែមិថុនា ឆ្នាំ២០២៦ រដ្ឋមន្រ្តីសន្តិសុខជាតិអ៉ីស្រាអែល លោក Itamar Ben Gvir ដែលមាននិន្នាការនយោបាយស្តាំនិយម បានចេញមុខថ្កោលទោស កិច្ចព្រមព្រៀងរវាងសហរដ្ឋអាមេរិកនិងអ៉ីរ៉ង់ ដែលសំដៅបិទបញ្ចប់សង្រ្គាមនៅតំបន់មជ្ឈិមបូព៌ាទាំងមូលរាប់បញ្ចូលទាំងលីបង់ ដោយលោកអះអាងថា អ៉ីស្រាអែលមិនជាប់កាតព្វកិច្ច​ក្នុងកិច្ចព្រមព្រៀងនោះទេ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ក្នុងប្រតិកម្មដំបូងពីសំណាក់មន្រ្តីអ៉ីស្រាអែល លោក Ben Gvir បានបង្ហោះសារនៅលើបណ្តាញសង្គមដូច្នេះថា «កិច្ចព្រមព្រៀងរបស់លោក ត្រាំ មិនចងភ្ជាប់យើងទេ... យើងមិនមែនជាភាគីក្នុងកិច្ចព្រមព្រៀងនេះទេ។ វាមិនធានាការពារសន្តិសុខយើងទេ។ ពួកយើងដាច់ខាតមិនត្រូវបញ្ចប់ឡើយ លុះត្រាតែកម្ទេចក្រុមហេសបូឡាបានទាំងស្រុង។ យើងមិនត្រូវដកថយសូម្បីតែមួយជំហានចេញពីទឹកដី ដែលកងទ័ពរបស់យើងកាន់កាប់បាន ហើយបានបោសសម្អាតហេដ្ឋារចនាសម្ព័ន្ធរបស់ពួកភេរវករ»។

កាលពីថ្ងៃអាទិត្យកន្លងទៅនេះ អាមេរិកនិងអ៉ីរ៉ង់ បានប្រកាសថា​ ទីបំផុតពួកគេបានឈានដល់កិច្ចព្រមព្រៀងគោលមួយ ដើម្បីបិទបញ្ចប់សង្រ្គាម​រវាងប្រទេសទាំងពីរហើយ ដែលនឹងលុបចោលការបិទខ្ទប់របស់សហរដ្ឋអាមេរិកលើអ៉ីរ៉ង់ និងការបើកច្រកសមុទ្រ Hormuz ឡើងវិញ ហើយ​ការចុះហត្ថលេខានឹងប្រព្រឹត្តទៅ នៅថ្ងៃសុក្រសប្តាហ៍នេះ ក្នុងប្រទេសស្វ៉ីស។

គួរបញ្ជាក់ថា លក្ខខណ្ឌលម្អិតនៃមិនទាន់ត្រូវបង្ហើបនៅឡើយទេ។ ប៉ុន្តែនាយករដ្ឋមន្ត្រីប៉ាគីស្ថាន Shehbaz Sharif ដែលជាអ្នកជួយសម្រុះសម្រួលជម្លោះអាមេរិក-អ៉ីរ៉ង់ បានឱ្យដឹងក្នុងការបង្ហោះមួយលើបណ្ដាញទំនាក់ទំនងសង្គម X ថាអនុស្សារណយោគយល់រវាងសហរដ្ឋអាមេរិក និងអ៉ីរ៉ង់បានអំពាវនាវឱ្យបិទបញ្ចប់ជាបន្ទាន់ និងអចិន្ត្រៃយ៍ នូវប្រតិបត្តិការយោធានៅគ្រប់សមរភូមិទាំងអស់ រួមទាំងនៅលីបង់ជាទីដែលអ៉ីស្រាអែល កំពុងបន្តការវាយប្រយុទ្ធជាមួយក្រុមហេសបូឡាគាំទ្រដោយអ៉ីរ៉ង់។

ក្នុងសេចក្ដីថ្លែងការណ៍មួយ លេខាធិការដ្ឋាននៃក្រុមប្រឹក្សាសន្តិសុខជាតិកំពូលរបស់អ៉ីរ៉ង់ ក៏បាននិយាយដែរថា សង្រ្គាមនិងប្រតិបត្តិការយោធានៅគ្រប់សរមភូមិទាំងអស់ ក្នុងនោះមានទាំងនៅលីបង់ នឹងត្រូវបិទបញ្ចប់ជាអចិន្ត្រៃយ៍ចាប់ពីយប់ថ្ងៃចន្ទសប្ដាហ៍នេះតទៅ។ ដោយឡែក កន្លងមក អ៉ីស្រាអែលធ្លាប់និយាយថា ខ្លួនមិនមែនជាភាគីនៃកិច្ចចរចារវាងសហរដ្ឋអាមេរិក និងអ៉ីរ៉ង់នោះទេ៕