(ប៉េកាំង)៖ នាថ្ងៃអង្គារ ទី១៦ ខែមិថុនា ឆ្នាំ២០២៦ ប្រធានាធិបតីមីយ៉ាន់ម៉ា លោក Min Aung Hlaing បានជួបជាមួយប្រធានាធិបតីចិន លោក ស៉ី ជីនពីង នៅទីក្រុងប៉េកាំង ដើម្បីព្យាយាមពង្រឹងទំនាក់ទំនងពាណិជ្ជកម្មនិងសន្តិសុខ ជាមួយទីក្រុងប៉េកាំងដែលជាសម្ព័ន្ធមិត្តដ៏សំខាន់​របស់ប្រទេសមួយនេះ ដែលកំពុងបន្តប្រឈមភាពឯកោផ្នែកការទូត។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

លោក ស៉ី បានទទួលស្វាគមន៍លោក Min Aung Hlaing នៅឯវិមានប្រជាជនចិនក្នុងទីក្រុងប៉េកាំង កាលពីព្រឹកថ្ងៃអង្គារនេះ មុនពេលមេដឹកនាំទាំងពីរ បើកកិច្ចពិភាក្សា។ លោកប្រធានាធិបតីមីយ៉ាន់ម៉ា ក៏ត្រូវបានរំពឹងថា នឹងជួបនាយករដ្ឋមន្រ្តីចិន លោក Li Qiang និងប្រធានសភាចិន លោក Zhao Leji ផងដែរ។ លោកបានធ្វើដំណើរមកដល់ប៉េកាំង កាលពីថ្ងៃចន្ទ ក្រោមការទទួលស្វាគមន៍ដោយ​កម្រាលព្រំក្រហម។

កាលពីថ្ងៃសុក្រសប្តាហ៍មុន អ្នកនាំពាក្យក្រសួងការបរទេសចិន លោក Lin Jian បាននិយាយថា ប្រទេសចិនសង្ឃឹមថា ដំណើរទស្សនកិច្ច​របស់លោក Min Aung Hlaing ក្នុងនាមជាប្រធានាធិបតីស៉ីវិល នឹងជំរុញឱ្យកិច្ចសហប្រតិបត្តិការយុទ្ធសាស្រ្តគ្រប់ជ្រុងជ្រោយកាន់តែស៉ីជម្រៅ ថែមទៀត។

គួរបញ្ជាក់ថា ចិនគឺជាដៃគូរឹងមាំកម្រមួយសម្រាប់មីយ៉ាន់ម៉ា បន្ទាប់ពីការធ្វើរដ្ឋប្រហារយោធារបស់លោក Min Aung Hlaing បានផ្តួលរំលំ​រដ្ឋាភិបាលស៉ីវិលជាប់ឆ្នោតស្របច្បាប់ របស់លោកស្រី អោងសាន ស៊ូជី កាលពីឆ្នាំ២០២១ ដែលនាំឱ្យក្រុមប្រទេសលោកខាងលិច កាត់ផ្តាច់​ទំនាក់ទំនងជាមួយប្រទេសអាស៊ានមួយនេះ។ ទីក្រុងប៉េកាំង បានដើរតួនាទីសំខាន់ ក្នុងការជួយសម្រុះសម្រួលសង្រ្គាមស៉ីវិល ដែលផ្ទុះឡើង​ក្រោយរដ្ឋប្រហារយោធា ហើយបានបង្ហាញការគាំទ្រក្លៀវក្លា ចំពោះការបោះឆ្នោតសកល ដែលបានបើកផ្លូវឱ្យលោក Min Aung Hlaing ត្រូវបានតែងតាំង​ជាប្រធានាធិបតីស៉ីវិលកាលពីខែមេសា ក្រោយដឹកនាំប្រទេសមីយ៉ាន់ម៉ា ក្នុងនាមជាប្រមុខរបបយោធាអស់រយៈពេលជាង៥ឆ្នាំ៕