(ហ្សឺណែវ)៖ កាលពីថ្ងៃចន្ទ ទី១៥ ខែមិថុនា ឆ្នាំ២០២៦ អង្គការសហប្រជាជាតិ (UN) បានឱ្យដឹងថា អំពើហិង្សាប្រព្រឹត្តដោយក្រុមជនអន្ធពាល បានផ្តាច់ជីវិតមនុស្សយ៉ាងហោច២៣០០នាក់ នៅប្រទេសហៃទីក្នុងឆ្នាំនេះ ខណៈជិត១០០នាក់ផ្សេងទៀតត្រូវបានចាប់ខ្លួន។ នេះបើតាមការចេញផ្សាយ ដោយទីភ្នាក់ងារព័ត៌មាន AFP។

ហៃទីដែលជាប្រទេសដែនកោះមានប្រជាជនសរុប១២លាននាក់ និងជាប្រទេសក្រីក្រជាងគេបង្អស់ នៅទ្វីបអាមេរិក ជាយូរមកហើយបានញាំញី​ដោយបញ្ហាអស្ថិរភាព ស្របពេលក្រុមជនអន្ធពាលដែលមានឥទ្ធិពលធំៗ នាំគ្នាប្រព្រឹត្តសកម្មភាពខុសច្បាប់តាមតែអំពើចិត្ត ដូចជាការកាប់សម្លាប់ ចាប់រំលោភ លួចប្លន់ និងចាប់ជំរិតជាដើម យ៉ាងអនាធិបតេយ្យ។

ប្រមុខសិទ្ធិមនុស្ស UN លោក Volker Turk បាននិយាយដូច្នេះថា «នៅហៃទី អំពើហិង្សារបស់ក្រុមជនអន្ធពាល បានបណ្តាលឱ្យមាន​មនុស្សស្លាប់យ៉ាងហោច ២៣០០នាក់ របួស១១០០នាក់ និង៩៩នាក់ត្រូវបានចាប់ជំរិត គិតចាប់តាំងពីដើមឆ្នាំនេះ។ ខ្ញុំទទូចឱ្យអាជ្ញាធរហៃទី ចាត់វិធានការរឹងមាំជាបន្ទាន់ ដើម្បីដាក់ទោសជនទាំងឡាយដែលបានប្រព្រឹត្តបទល្មើស»។

កាលពីឆ្នាំ២០២៥ ក្រុមប្រឹក្សាសន្តិសុខ UN បានផ្តល់ការអនុញ្ញាតចំពោះផែនការដាក់ពង្រាយកងកម្លាំងអន្តរជាតិថ្មី ហៅកាត់ថា GSF ដែល​មានភារកិច្ចត្រូវបោសសម្អាតក្រុមជនអន្ធពាល នៅក្នុងប្រទេសហៃទី។ កងកម្លាំងថ្មីនោះនឹងជំនួសដោយសន្សឹមៗ កងកម្លាំងបេសកកម្មមុន ហៅកាត់ថា MMAS ដែលបានជួយគាំទ្រប៉ូលិសហៃទី។

គួរបញ្ជាក់ថា ក្រុមប្រឹក្សាសន្តិសុខ UN បានអនុម័តការដាក់ពង្រាយកងកម្លាំង GSF ក្រោមការទទូចពីសហរដ្ឋអាមេរិក កាលពីខែកញ្ញា ឆ្នាំមុន ចំពោះមុខក្តីកង្វល់ថា កងកម្លាំង MMAS មិនមានធនធានគ្រប់គ្រាន់ ដើម្បីបំពេញបេសកកម្មប្រកបដោយប្រសិទ្ធភាព៕