(បាងកក)៖ អ្នកនាំចេញបង្គា និងកសិករនៅភាគខាងត្បូងប្រទេសថៃ កំពុងជួបភាពមិនច្បាស់លាស់ ខណៈដែលអ្នកបញ្ជាទិញនៅម៉ាឡេស៉ី បានពន្យារពេល ឬផ្អាកការបញ្ជាទិញ ក្រោយប្រទេសទាំងពីរ មានជម្លោះនឹងគ្នាពាក់ព័ន្ធបញ្ហាគ្រឿងសមុទ្រ តាំងកាលពីខែមុន។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃអង្គារ ទី១៦ ខែមិថុនា ឆ្នាំ២០២៦។

ទីក្រុងបាងកក បានរឹតបន្តឹងការនាំចូលត្រីសមុទ្រមួយប្រភេទរបស់ម៉ាឡេស៉ី ហៅថា sea bass ដោយសារតែក្តីបារម្ភអំពីសំណល់គីមីនៅក្នុងខ្លួនត្រី។ ម៉ាឡេស៉ីបានឆ្លើយតប ដោយដាក់បម្រាមបណ្តោះអាសន្ន លើការនាំចូលបង្គាចំនួន ៥ប្រភេទពីប្រទេសថៃ ក្រោមហេតុផលគ្រប់គ្រងសុវត្ថិភាពចំណីអាហារ។

ឈ្មួញនាំចេញបង្គា នៅ​ខេត្ត Songkhla ប្រទេសថៃ បាននិយាយថា ផលប៉ះពាល់ភ្លាមៗបំផុតនោះ គឺភាពមិនច្បាស់លាស់ជុំវិញការបញ្ជាទិញ។ ម៉ាឡេស៉ី​ជា​ទីផ្សារ​នាំ​ចេញ​ប្រចាំ ​ដោយ​សារជា​ប្រទេស​ជិត​ខាង ហើយអាចនាំចេញតាម​ច្រកព្រំដែន។

ឈ្មួញរូបនេះបានឱ្យដឹងថា នៅពេលដែលអតិថិជនមួយចំនួនពន្យារពេល ឬផ្អាកការបញ្ជាទិញ ការចំណាយលើស្តុកទុក និងផ្សេងៗទៀតបានកើនឡើង ហើយរកប្រភពមកជំនួសម៉ាឡេស៉ី មិនមែនជារឿងធម្មតានោះទេ ពីព្រោះគោលដៅផ្សេងទៀត អាចមានការតម្រូវជាក់លាក់លើផលិតផល បទប្បញ្ញត្តិ និងតម្រូវការអ្នកទិញខុសៗគ្នា៕