(កូឡុំបូ)៖ ប្រទេសស្រីលង្កា កំពុងប្រយុទ្ធប្រឆាំងនឹងការផ្ទុះឡើងនៃជំងឺគ្រុនឈាមដ៏អាក្រក់បំផុតក្នុងរយៈពេលប៉ុន្មានឆ្នាំចុងក្រោយនេះ ដោយមានករណីឆ្លងជាង ៤៤,០០០នាក់ និងស្លាប់ចំនួន ២៨នាក់ ត្រូវបានកត់ត្រាចាប់តាំងពីខែមករាមក។ ស្ថានភាពនេះកំពុងដាក់សម្ពាធយ៉ាងខ្លាំងដល់មន្ទីរពេទ្យរដ្ឋនានា។ នេះបើតាមការបញ្ជាក់ពីមន្ត្រីសុខាភិបាលនៅថ្ងៃសុក្រ និងការចេញផ្សាយដោយទីភ្នាក់ងារសារព័ត៌មាន Reuters។

ជំងឺគ្រុនឈាមគឺជារឿងធម្មតាដែលកើតមានក្នុងរដូវមូសុងនៅប្រទេសស្រីលង្កា ប៉ុន្តែអាជ្ញាធរបានបញ្ជាក់ថា ការពង្រីកទីក្រុងដោយគ្មានផែនការច្បាស់លាស់ រួមផ្សំនឹងការខូចខាតដែលបង្កឡើងដោយព្យុះស៊ីក្លូន Ditwah ដែលបានវាយប្រហារប្រទេសកោះមួយនេះកាលពីចុងខែវិច្ឆិកា គឺជាកត្តាចម្បងដែលធ្វើឱ្យការរាតត្បាតក្នុងឆ្នាំនេះ កាន់តែមានសភាពធ្ងន់ធ្ងរ។

អ្នកនាំពាក្យរបស់អង្គភាពត្រួតពិនិត្យជំងឺគ្រុនឈាមជាតិ (NDCU) បានប្រាប់ Reuters ថា «យើងបានកត់សម្គាល់ឃើញពីការកើនឡើងនេះ បន្ទាប់ពីមានព្យុះស៊ីក្លូនរួចមក។ កម្ទេចកម្ទីជាច្រើនត្រូវបានបន្សល់ទុកនៅក្នុងបរិស្ថាន ដែលបង្កើតជាជម្រកសម្រាប់មូសខ្លាបង្កាត់ពូជ ហើយសន្ទស្សន៍សត្វល្អិតក៏បានកើនឡើងខ្ពស់ចាប់តាំងពីពេលនោះមក»។

គួរបញ្ជាក់ថា អត្រានៃការឆ្លងក្នុងឆ្នាំនេះមានការកើនឡើងយ៉ាងគំហុក បើធៀបនឹងតួលេខ ៥១,០០០ករណី សម្រាប់ពេញមួយឆ្នាំកាលពីឆ្នាំមុន។ ហើយការឆ្លងត្រូវបានគេរំពឹងថានឹងបន្តកើនឡើងយ៉ាងហោចណាស់ពីរសប្តាហ៍ទៀត មុនពេលថយចុះមកវិញ៕