(រ៉ូម)៖ អ៉ីតាលីបានបញ្ចេញប្រតិកម្មយ៉ាងខឹងសម្បារ កាលពីថ្ងៃសុក្រ ទី១៩ ខែមិថុនា ឆ្នាំ២០២៦ បន្ទាប់ពីមានសេចក្តីរាយការណ៍អំពីការអត្ថាធិប្បាយរបស់​ប្រធានាធិបតីអាមេរិក លោក ដូណាល់ ត្រាំ ដែលមានខ្លឹមសារចំអកលើនាយករដ្ឋមន្រ្តីនៃប្រទេសអ៉ីតាលី លោកស្រី Giorgia Meloni រហូតជំរុញឱ្យ​រដ្ឋមន្រ្តីការបរទេសអ៉ីតាលី លុបចោលគម្រោងធ្វើទស្សនកិច្ចទៅកាន់សហរដ្ឋអាមេរិក។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

លោកស្រី Meloni ផ្ទាល់ បាននិយាយថា លោកស្រីភ្ញាក់ផ្អើលចំពោះការអត្ថាធិប្បាយរបស់លោក ត្រាំ ដែលបានធ្វើឡើងជាមួយប្រព័ន្ធផ្សព្វផ្សាយអ៉ីតាលី La7។ យោងតាមខ្លឹមសារនៃកិច្ចសម្ភាសតាមទូរសព្ទដែល La7 ផ្តល់ឱ្យ AFP លោកប្រធានាធិបតីអាមេរិក បានអះអាងថា លោកស្រី Meloni បានអង្វរលោកដើម្បីសុំថតរូប នៅឯកិច្ចប្រជុំកំពូល G7 ក្នុងសប្តាហ៍នេះ ហើយលោកបានយល់ព្រមថតជាមួយ គឺដោយសារតែលោកអាណិតលោកស្រីប៉ុណ្ណោះ។ លោក ត្រាំ ថែមទាំងបានអះអាងទៀតថា លោកស្រី Meloni ក៏ប្រហែលជាសប្បាយចិត្តផងដែរ ដែលបានរូបលោកនិយាយរក ខណៈតាមពិតគឺលោកមិនចាំបាច់អ្វីត្រូវនិយាយ​ជាមួយលោកស្រីឡើយ។

លោកស្រី Meloni បានហៅការលើកឡើងរបស់លោក ត្រាំ ថាជាសម្តីប្រឌិត ហើយអះអាងថា ទាំងលោកស្រី និងប្រទេសអ៉ីតាលីទាំងមូល គឺមិនដែលអង្វរករគេទេ។ រីឯរដ្ឋមន្រ្តីការបរទេសអ៉ីតាលី លោក Antonio Tajani បាននិយាយថា សម្តីរបស់លោក ត្រាំ គឺជាការប្រមាថធ្ងន់ធ្ងរមួយ ហើយលោកសម្រេចចិត្តលុបចោល​ទស្សនកិច្ចទៅកាន់អាមេរិក ដែលគ្រោងធ្វើឡើងនាថ្ងៃទី២១-២២ ខែមិថុនានេះ។ ចំណែក រដ្ឋមន្រ្តីយុត្តិធម៌ លោក Carlo Nordio បានលើកឡើងថា ការអត្ថាធិប្បាយនោះ គឺជាការបង្ករបួសដ៏ឈឺចាប់មួយ ចំពោះទំនាក់ទំនងអ៉ីតាលី-អាមេរិក ខណៈរដ្ឋមន្រ្តីការពារជាតិ លោក Guido Crosetto បានលើកឡើងថា ពាក្យលេងសើចទាំងនេះ មិនផ្តល់ផលចំណេញដល់នរណាមួយនោះទេ។

គួរបញ្ជាក់ថា នៅពេលចុងបញ្ចប់នៃកិច្ចប្រជុំ G7 ក្នុងប្រទេសបារាំង កាលពីថ្ងៃពុធសប្តាហ៍នេះ លោកស្រី Meloni បានលើកឡើងពីបរិយាកាសដ៏វិជ្ជមាន ហើយ​អះអាងថា ពុំមានភាពរកាំរកូសរវាងលោក ត្រាំ និងបណ្តាមេដឹកនាំពិភពលោកដទៃទៀត ដែលមានវត្តមាននៅទីនោះឡើយ។ អំឡុងព្រឹត្តិការណ៍កិច្ចប្រជុំកំពូលនោះ លោកស្រី Meloni ត្រូវគេឃើញមានវត្តមានជាមួយលោក ត្រាំ ដល់ទៅប៉ុន្មានលើក រួមទាំងអំឡុងជំនួបមួយអង្គុយនៅលើសាឡុង។ លោកស្រីធ្លាប់បានព្យាយាមតាំងខ្លួនជាស្ពានរវាងអឺរ៉ុបនិងរដ្ឋបាលលោក ត្រាំ ប៉ុន្តែទំនាក់ទំនងបានជួបភាពតានតឹង អំឡុងសង្រ្គាមនៅមជ្ឈិមបូព៌ា៕