(ប៉េកាំង)៖ លោក Xi Zhongxun ជាឪពុកបានជះឥទ្ធិពលយ៉ាងខ្លាំងទៅលើលោក Xi Jinping ជាកូនបុ្រស។ កើតក្នុងគ្រួសារកសិករមួយនៅស្រុក Fuping ខេត្ត Shaanxi លោក Xi Zhongxun ពូកែធ្វើការងារកសិកម្ម។ នៅពេលដែលលោកបម្រើការជាលេខាធិការបក្សនៅតំបន់ Guanzhong លោកបានជីករូងភ្នំពីរផ្ទាល់ខ្លួនសម្រាប់ទាំងលំនៅដ្ឋាន និងការិយាល័យរបស់លោក។

«ខ្ញុំជាកូនប្រុសរបស់កសិករ» គឺជាឃ្លាមួយដែលលោក Xi Zhongxun តែងតែនិយាយនៅផ្ទះ។ អស់រយៈពេលជាច្រើនទសវត្សរ៍មកហើយ លោកបានរក្សាអត្តចរិតជាប្រជាពលករ។ អត្តចរិតរបស់លោកឪពុក បានជះឥទ្ធិពលយ៉ាងខ្លាំងដល់ជីវិតរបស់លោក Xi Jinping។ នៅដើមឆ្នាំ១៩៦៩ លោក Xi Jinping ដែលមិនទាន់មានអាយុ១៦ឆ្នាំផងនោះ បានស្នើសុំធ្វើការនៅជនបទ ភាគខាងជើងខេត្ត Shaanxi។

នៅក្នុងឆ្នាំទាំងនោះ លោកបានធ្វើស្រែចម្ការ ដឹកធ្យូងថ្ម សាងសង់ទំនប់ ដឹកលាមក។ល។ លោកបានធ្វើការនិងរស់នៅជាមួយអ្នកភូមិ Liangjiahe។ ក្នុងរយៈពេលត្រឹមតែប៉ុន្មានឆ្នាំប៉ុណ្ណោះ លោកបានវិវឌ្ឍពីក្មេងប្រុសទីក្រុងទៅជាអ្នកពូកែធ្វើការងារកសិកម្មម្នាក់។ នៅពេលដែលលោក Xi Jinping ចាកចេញពីតំបន់ខ្ពង់រាបក្នុងអាយុ ២២ឆ្នាំ លោកបានកំណត់គោលដៅជីវិតដ៏រឹងមាំ មួយរួចទៅហើយ គឺ «ធ្វើរឿងជាក់ស្តែងសម្រាប់ប្រជាជន»។ នៅឆ្នាំ១៩៧៨ លោក Xi Zhongxun បានឡើងកាន់តំណែងជាអភិបាលខេត្តក្វាងទុង។ ដើម្បីស្វែងយល់ពីស្ថានភាពពិតនៅតាម មូលដ្ឋាន លោកមិនត្រឹមតែធ្វើដំណើរទៅកាន់ទីក្រុង និងស្រុកទាំង២៣ ក្នុងខេត្តក្វាងទុងប៉ុណ្ណោះទេ ប៉ុន្តែថែមទាំងតែងតែទៅផ្សារជាមួយលេខាធិការរបស់លោកដើម្បីទិញបន្លែផងដែរ។

នៅពេលណាដែលលោកបានជួបជាមួយនរណាម្នាក់ មិនថាលោកស្គាល់ពួកគេឬអត់នោះទេ លោកតែងតែជជែកជាមួយពួកគេអំពីរឿងប្រចាំថ្ងៃ ដើម្បីស្វែងយល់អំពីស្ថានភាពក្នុងវិស័យជាច្រើន។ នៅពេលនោះ លោក Xi Jinping កំពុងសិក្សានៅសាកលវិទ្យាល័យ Tsinghua ក្រុងប៉េកាំង។ ក្នុងវិស្សមកាលរដូវក្តៅ លោកបានធ្វើដំណើរទៅដល់ខេត្តក្វាងទុង ដើម្បីអមដំណើរឪពុករបស់ លោកចុះទៅស្វែងយល់ពីសភាពការណ៍នៅជនបទ។ របៀបធ្វើការជាក់ស្តែងរបស់ឪពុក បានចាក់ឫសយ៉ាងស្ងៀមស្ងាត់នៅក្នុងចិត្តរបស់លោក។

នៅឆ្នាំ១៩៨២ លោក Xi Jinping បានចាប់ផ្តើមអាជីពនយោបាយរបស់លោកនៅស្រុក Zhengding។ នៅពេលនោះ លោក Xi Jinping បានបន្សល់ទុកនូវចំណាប់អារម្មណ៍ដល់មនុស្ស ជាច្រើនដែលថាលោក «មិនដែលអង្គុយនៅទំនេរក្នុងការិយាល័យឡើយ»។ លោកតែងតែជិះកង់ទៅជនបទដើម្បីចុះត្រួតពិនិត្យនិងស្វែងយល់ពីការងារ និងរៀបចំតុនៅតាមផ្លូវ ដើម្បីឆ្លើយសំណួររបស់មហាជននៅនឹងកន្លែង។ នៅក្នុងលិខិតអបអរសាទរខួបកំណើតជូនលោក Xi Zhongxun ជាឪពុក លោកXi Jinping បានសរសេរថា “លោកដូចជាគោចាស់មួយក្បាល ធ្វើការដោយស្ងៀមស្ងាត់សម្រាប់ប្រជាជនចិន។ រឿងនេះបានលើកទឹកចិត្តខ្ញុំឱ្យលះបង់ជីវិតដើម្បីបម្រើប្រជាជន និងសងគុណប្រទេសចិន និងពុកម៉ែបងប្អូនជនរួមជាតិរបស់ខ្ញុំដែល បានចិញ្ចឹមបីបាច់ថែរក្សាខ្ញុំ”។

ពេលថ្លែងក្នុងសុន្ទរកថាសាធារណៈលើកដំបូងបន្ទាប់ពីត្រូវបានជ្រើសតាំងជាអគ្គលេខាធិការនៃគណៈកម្មាធិការមជ្ឈិមបក្សកុម្មុយនីស្តចិននៅឆ្នាំ២០១២ លោក Xi Jinping បានសន្យា យ៉ាងម៉ឺងម៉ាត់ថាបំណងប្រាថ្នារបស់ប្រជាជនចំពោះជីវិតដ៏ល្អបវរ គឺជាគោលដៅតស៊ូរបស់យើង”។ ចាប់តាំងពីយុគសម័យថ្មីមក លោកតែងតែតម្កល់ប្រជាជនជាចម្បងនៅក្នុងអភិបាលកិច្ចជាតិ គ្រប់វិស័យ ដើម្បីដឹកនាំប្រជាជនទាំងអស់ឱ្យកសាងសង្គមដែលប្រជាជនមានជីវភាពធូធារបង្គួរ និងជំរុញវិបុលភាពរួមសម្រាប់ទាំងអស់គ្នាយ៉ាងប្រាកដប្រជា។ លោកបានចាត់ទុកមតិយោបល់ របស់ប្រជាជនជា «ស្តង់ដារល្អបំផុត ហើយខិតខំប្រឹងប្រែងដើម្បី«ធានាថាផ្លែផ្កានៃការអភិវឌ្ឍផ្តល់ផលប្រយោជន៍ដល់ប្រជាជនទាំងអស់ឱ្យបានកាន់តែច្រើន កាន់តែមានសមធម៌»។ល។

ពី «មេដឹកនាំមហាជន» រហូតដល់ «អ្នកបម្រើប្រជាជន» លោក Xi zhongxun និងលោក Xi Jinping ដែលជាសមាជិកបក្សកុម្មុយនីស្តចិនពីរជំនាន់ បានធ្វើការពន្យល់ដ៏រស់រវើកបំផុតអំពី «ការប្រកាន់ខ្ជាប់នូវគោលការណ៍នៃការធ្វើអភិបាលកចិ្ចដើម្បីប្រជាជន» ជាមួយនឹងចម្លើយរៀងៗខ្លួនចំពោះបញ្ហាប្រឈមនៃសម័យកាលរបស់ពួកគេ ហើយបានកំណត់ស្តង់ដារសម្រាប់សមាជិកបក្ស ទាំងអស់ស្តីពីការតម្កល់ប្រជាជនជាស្នូល៕

វិទ្យុមិត្តភាពកម្ពុជាចិន