បទវិភាគ៖ ប្រទេសចិនដែលមិនអាចជំនួសបាន៖ ពី «រោងចក្រពិភពលោក» ដល់ «ដៃគូច្នៃប្រឌិតថ្មីសកល»
22-06-2026 16:59
(ប៉េកាំង)៖ នៅក្នុងកិច្ចប្រជុំកំពូលក្រុង Qingdao នៃថ្នាក់ដឹកនាំក្រុមហ៊ុនពហុជាតិលើកទី៧ ដែលបានបិទបញ្ចប់នៅពេលថ្មីៗកន្លងទៅនេះ សហគ្រាសពហុជាតិបាននាំគ្នាប្រើពាក្យ "មិនអាចជំនួសបាន"មកពិពណ៌នាប្រទេសចិន ដោយសម្គាល់ឃើញថា មិនថាការធ្វើអាជីវកម្មយ៉ាងស៊ីជម្រៅនៅចិន ការពង្រីកការវិនិយោគឬក៏ការឆ្ពោះទៅកាន់ពិភពលោក វាសុទ្ធតែមិនអាចឃ្លាតពីដៃគូចិនបានឡើយ ។
កិច្ចប្រជុំកំពូលលើកនេះបានទាក់ទាញមន្រ្តីជាន់ខ្ពស់ នៃសហគ្រាសពហុជាតិចំនួន៣២២រូបមកពីប្រទេសនិងតំបន់ចំនួន៤៤នៅទូទាំងពិភពលោកទៅចូលរួម ដោយបានចុះហត្ថលេខាលើគម្រោងសំខាន់ៗចំនួន៥៧ ដែលក្នុងនោះ គម្រោងវិនិយោគបរទេសចំនួន ២០ មានទំហំវិនិយោគសរុប ២,៥៦ ពាន់លានដុល្លារអាមេរិក ។ ក្រៅពីនេះ កិច្ចប្រជុំកំពូលលើកនេះក៏បានបង្កើត"លើកដំបូង"ជាច្រើនផងដែរ ដូចជា៖បានរៀបចំសកម្មភាពពិសេសជាលើកដំបូងអំពីរថយន្តថាមពលថ្មី ការផ្ទុកថាមពលបែបថ្មី និងកសិកម្មឆ្លាតវៃជាដើម និងរៀបចំជាលើកដំបូងនូវកិច្ចប្រជុំបិទទ្វារអំពីគោលនយោបាយជុំវិញ ការពង្រីកការបើកទូលាយខាងវិស័យឧស្សាហកម្មសេវាកម្មជាដើម ។
ក្នុងកិច្ចប្រជុំលើកនេះ ពាក្យដែលមន្រ្តីជាន់ខ្ពស់នៃសហគ្រាសពហុជាតិ បានលើកឡើងញឹកញាប់បំផុតគឺ"ត្រួសត្រាយជាមួយគ្នា" ដែលមានន័យថា ការផ្លាស់ប្តូរពីការលក់និងផលិតកម្មក្នុងគ្រាដំបូងឆ្ពោះទៅរកដំណាក់កាលថ្មី នៃការសហការគ្នាច្នៃប្រឌិតថ្មីនិងការកសាងប្រព័ន្ធអេកូឡូស៊ីរួមគ្នា ។ ឆ្នាំនេះជាឆ្នាំចាប់ផ្តើមនៃការអនុវត្ត “ផែនការអភិវឌ្ឍន៍ជាតិ៥ឆ្នាំទី១៥” របស់ចិន សហគ្រាសពហុជាតិបានកំណត់ទម្រង់របស់ខ្លួនថាជា "អ្នកកសាងជាមួយគ្នានិងជាដៃគូសហប្រតិបត្តិការ" ដោយបង្ហាញថា ពួកគេនឹងពឹងផ្អែកលើទីផ្សារដ៏ធំធេង ខ្សែសង្វាក់ឧស្សាហកម្មដ៏ពេញលេញនិងបរិយាកាសសហប្រតិបត្តិការប្រកបដោយភាពបើកទូលាយរបស់ចិន ដើម្បីបង្កើនប្រសិទ្ធភាពនៃការចាត់ចែងធនធានសកលនិងសម្រេចយ៉ាងពិតប្រាកដនូវអ្វីដែលថា "នៅប្រទេសចិន ដើម្បីពិភពលោក"។
បើនិយាយចំពោះ"ការត្រួសត្រាយជាមួយគ្នា" ជាបឋមត្រូវរកឃើញឱកាសថ្មី។ ទីផ្សារដ៏ធំធេងរបស់ចិនដែលកំពុងលើកកម្ពស់លំដាប់ថ្នាក់ជាបន្តបន្ទាប់បានផ្តល់លំហដ៏ទូលំទូលាយ សម្រាប់ការស្វែងរកឱកាសថ្មីរបស់ទុនបរទេស។ ទន្ទឹមនឹងនេះ ការលើកកម្ពស់សមត្ថភាពច្នៃប្រឌិតថ្មីរបស់ចិនបានបំពេញបន្ថែមកម្លាំងចលករ សម្រាប់ការរួមគ្នាត្រួសត្រាយយ៉ាងស៊ីជម្រៅ។ របាយការណ៍ដែលចេញផ្សាយក្នុងកិច្ចប្រជុំកំពូលនេះបានលើកឡើងថា ចិនបានបង្កើតទីផ្សារប្រើប្រាស់ធំបំផុតលើពិភពលោក អេកូឡូស៊ីឧស្សាហកម្មដ៏ពេញលេញបំផុត និងឈុតឆាកច្នៃប្រឌិតថ្មីដ៏សម្បូរបែបបំផុតលើទូទាំងពិភពលោក ដែលធ្វើឱ្យកម្លាំងទាក់ទាញសកលកំពុងកើនឡើងជាលំដាប់ ។ កម្លាំងទាក់ទាញបែបនេះត្រូវបានឆ្លុះបញ្ចាំងក្នុងរចនាសម្ព័ន្ធនៃការកៀរគរទុនបរទេសរបស់ចិន៖ នៅឆ្នាំ២០២៥ ការប្រើប្រាស់ទុនបរទេសជាក់ស្តែងក្នុងវិស័យសិក្សាស្រាវជ្រាវវិទ្យាសាស្ត្រនិងសេវាកម្មបច្ចេកវិទ្យារបស់ចិនត្រូវជាជិត១ភាគ៥នៃទំហំសរុប ដែលស្មើនឹង៣,៨ដងបើប្រៀបធៀបនឹងឆ្នាំ២០១៨ ។
បើសម្លឹងមើលឱ្យវែងឆ្ងាយ ទ្វារបើកទូលាយរបស់ចិនរឹតតែធំឡើងៗ ដែលផ្តល់ការរំពឹងទុកខាងគោលនយោបាយដ៏នឹងនរសម្រាប់ការវិនិយោគទុនបរទេសចាក់គ្រឹះនៅប្រទេសចិន។ ពីខែមករាដល់ខែមេសាឆ្នាំនេះ ចិនបានបង្កើតសហគ្រាសវិនិយោគបរទេសថ្មីជាង ២ ម៉ឺន ដែលកើនឡើង ៦,៨ភាគរយ បើប្រៀបធៀបនឹងរយៈពេលដូចគ្នានាឆ្នាំមុន ។ ក្រុមហ៊ុន Revvity របស់សហរដ្ឋអាមេរិកបានវិនិយោគលើការច្នៃប្រឌិតថ្មីក្នុងប្រទេសចិនក្នុងរយៈពេលជិត៣ឆ្នាំចុងក្រោយនេះ គឺលើសពីទំហំសរុបក្នុងរយៈពេល១០ឆ្នាំកន្លងទៅនេះ ។ ក្រុមហ៊ុនNovo Nordisk របស់ដាណឺម៉ាកបានប្រកាសពង្រីក ការសាងសង់មូលដ្ឋានផលិតកម្មនៅក្រុង Guangzhou ។ ក្រុមហ៊ុន Schneider Electric របស់បារាំងបានប្រកាសសាងសង់ រោងចក្រថ្មីចំនួនពីរនៅប្រទេសចិននិងលើកកម្ពស់លំដាប់ថ្នាក់នៃមជ្ឈមណ្ឌលស្រាវជ្រាវនិងអភិវឌ្ឍន៍ក្រុងប៉េកាំង...
ពី "ការចូលវិនិយោគនៅប្រទេសចិន" ដល់ "ការធ្វើអាជីវកម្មយ៉ាងស៊ីជម្រៅនៅប្រទេសចិន" រហូតដល់ "ការត្រួសត្រាយរួមគ្នាជាមួយប្រទេសចិន" ជំហាននីមួយៗនៃការធ្វើអាជីវកម្មយ៉ាងស៊ីជម្រៅរបស់សហគ្រាសពហុជាតិក្នុងប្រទេសចិន សុទ្ធតែមានភាពស៊ីសង្វាក់គ្នាជាមួយការអភិវឌ្ឍសេដ្ឋកិច្ចរបស់ចិន ។ ឆ្លៀតឱកាសនៃការជំរុញការអនុវត្ត"ផែនការអភិវឌ្ឍន៍ជាតិ៥ឆ្នាំទី១៥"របស់ចិន សហគ្រាសពហុជាតិមុខជានឹងទទួលអារម្មណ៍កាន់តែជ្រាលជ្រៅថា "ជឿជាក់ប្រទេសចិន គឺជឿជាក់អនាគត ហើយវិនិយោគលើប្រទេសចិន គឺវិនិយោគចំពោះអនាគត"៕
វិទ្យុមិត្តភាពកម្ពុជាចិន
