(ញូវដេលី)៖ ទីប្រឹក្សាសន្តិសុខជាតិឥណ្ឌា លោក អាជីត ដូវ៉ាល (Ajit Doval) បានជួបពិភាក្សាការងារជាមួយរដ្ឋមន្ត្រីការបរទេសចិន លោក វ៉ាង យី (Wang Yi) នៅថ្ងៃចន្ទ នៅខាងក្រៅកិច្ចប្រជុំទីប្រឹក្សាសន្តិសុខជាតិ BRICS ក្នុងទីក្រុងញូវដេលី។ នេះបើតាមការប្រកាសរបស់ក្រសួងការបរទេសឥណ្ឌា និងការចេញផ្សាយដោយទីភ្នាក់ងារសារព័ត៌មាន Reuters។

ក្នុងនាមជាប្រធានប្តូរវេននៃក្រុម BRICS ឥណ្ឌាបានធ្វើជាម្ចាស់ផ្ទះរៀបចំកិច្ចប្រជុំរយៈពេលពីរថ្ងៃ (ថ្ងៃចន្ទ និងថ្ងៃអង្គារ)។ ក្រសួងការបរទេសឥណ្ឌាបានចាត់ទុកកិច្ចពិភាក្សារវាងលោក ដូវ៉ាល និងលោក វ៉ាង យី ថាប្រព្រឹត្តទៅប្រកបដោយ «លក្ខណៈស្ថាបនា និងសម្លឹងឆ្ពោះទៅមុខ»។ មន្ត្រីជាន់ខ្ពស់ទាំងពីរបានពិភាក្សាអំពីការវិវឌ្ឍថ្មីៗនៃទំនាក់ទំនងទ្វេភាគី និងបានកត់សម្គាល់ពីវឌ្ឍនភាពដែលកំពុងឈានទៅរក «ការធ្វើប្រក្រតីភាពជាបណ្តើរៗ»។

គួររំលឹកថា ទំនាក់ទំនងរវាងប្រទេសជិតខាងដែលមានប្រជាជនច្រើនជាងគេលើលោកទាំងពីរនេះ បានចាប់ផ្តើមប្រសើរឡើងវិញតាំងពីឆ្នាំ២០២៤ មកម្ល៉េះ ដែលជាការបិទបញ្ចប់ភាពរកាំរកូសអស់ជាច្រើនឆ្នាំ បន្ទាប់ពីមានការប៉ះទង្គិចគ្នាយ៉ាងតានតឹងនៅតំបន់ព្រំដែនកាលពីឆ្នាំ២០២០៕