(យូអិន)៖ ប្រធានកម្មវិធីរួមរបស់អង្គការសហប្រជាជាតិស្តីពីមេរោគអេដស៍/ជំងឺអេដស៍​ (UNAIDS) បានសម្តែងការសោកស្ដាយ ចំពោះផែនការរបស់សហរដ្ឋអាមេរិក ក្នុងការដកមូលនិធិ សម្រាប់ដោះស្រាយបញ្ហាមេរោគអេដស៍/ជំងឺអេដស៍ សម្រាប់ប្រទេសអាហ្វ្រិកខាងត្បូង និងបានជំរុញឱ្យទីក្រុងវ៉ាស៉ីនតោនពិចារណាឡើងវិញ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃអង្គារ ទី២៣ ខែមិថុនា ឆ្នាំ២០២៦។

លោកស្រី Winnie Byanyima បានប្រាប់សន្និសីទព័ត៌មានរបស់ UN នៅមុនសន្និសីទកម្រិតខ្ពស់ស្តីពីមេរោគអេដស៍/ជំងឺអេដស៍ យ៉ាងដូច្នេះថា «ការដកជំនួយ ប្រៀបបាននឹងការឆក់យកជីវិត ដកការជួយសង្គ្រោះមនុស្សដែលងាយរងគ្រោះបំផុត។ ដូច្នេះវាជារឿងដ៏សោកសៅ»។

នៅក្នុងការជូនដំណឹងតាមសារអ៉ីមែល ក្រសួងការបរទេសអាមេរិកបញ្ជាក់ថា សហរដ្ឋអាមេរិក បានសម្រេចចិត្តផ្តួចផ្តើមការដកជាដំណាក់កាលៗ ក្នុងផែនការសង្គ្រោះបន្ទាន់សម្រាប់អាហ្វ្រិកខាងត្បូង បន្ទាប់ពីប្រទេសនេះ បរាជ័យក្នុងការធ្វើឱ្យមានវឌ្ឍនភាពលើសំណើគោលនយោបាយ ពីសំណាក់រដ្ឋបាលលោក ត្រាំ។

គេហទំព័រព័ត៌មាន Semafor របស់អាហ្វ្រិកខាងត្បូង បានរាយការណ៍កាលពីសប្តាហ៍មុន ដោយដកស្រង់សម្តីមន្ត្រីក្រសួងការបរទេស និងមន្រ្តីសភាពីររូប ថាការសម្រេចចិត្តនេះ គឺជាការឆ្លើយតបទៅនឹងភាពបរាជ័យរបស់អាហ្វ្រិកខាងត្បូង ក្នុងការបំពេញការទាមទាររបស់សហរដ្ឋអាមេរិក ដែលចង់ឱ្យកាត់បន្ថយភាពជាដៃគូជាមួយអ៉ីរ៉ង់ បញ្ចប់គោលនយោបាយពង្រឹងសេដ្ឋកិច្ចខ្មៅ និងការនិយាយរើសអើងប្រឆាំងពូជសាសន៍។

តាមលោកស្រី Byanyima ការដកមូលនិធិ អាចបណ្តាលឱ្យមានមនុស្សស្លាប់នៅអាហ្រ្វិកខាងត្បូង ដែលមានចំនួនអ្នកឆ្លងមេរោគអេដស៍ច្រើនបំផុត៕