(គីនស្ហាសា)៖ កាលពីយប់ថ្ងៃចន្ទ ទី២២ ខែមិថុនា ឆ្នាំ២០២៦ សាធារណរដ្ឋប្រជាធិបតេយ្យកុងហ្គោ បានប្រកាសឱ្យដឹងថា ចំនួនករណីជំងឺអេបូឡាដែលផ្ទៀងផ្ទាត់ច្បាស់លាស់ នៅក្នុងប្រទេសអាហ្រ្វិកមួយនេះ បានបន្តកើនឡើងដល់១០៤៨នាក់ ក្នុងនោះ​មានអ្នកស្លាប់២៦៧នាក់។ នេះបើតាមកាចេញផ្សាយដោយ ទីភ្នាក់ងារព័ត៌មាន Reuters។

កាលពីថ្ងៃអាទិត្យចុងសប្តាហ៍កន្លងទៅនេះ ចំនួនករណីដែលផ្ទៀងផ្ទាត់ច្បាស់ បានកើនលើស១០០០នាក់ ជាលើកដំបូង គិតចាប់តាំងពីពេលផ្ទុះឡើងនៃការឆ្លងរាលដាលថ្មីចុងក្រោយ ដែលត្រូវបានប្រកាសជាផ្លូវការកាលពីថ្ងៃទី១៥ ខែឧសភា ប៉ុន្តែការចម្លងវីរុសហាក់បានចាប់ផ្តើមតាំងពីមុនពេលនោះទៅទៀត។

សឹងតែទាំងអស់នៃករណីខាងលើ គឺត្រូវបានរកឃើញនៅខេត្ត Ituri ភាគឦសាន ដែលជាតំបន់ញាំញីដោយជម្លោះ ដោយសារក្រុមប្រដាប់អាវុធ។ សរុបជារួម ខេត្តចំនួន៣ ដែលបានរងផលប៉ះពាល់ រួមមានទាំងខេត្ត Kivu ខាងជើង និងខេត្ត Kivu ខាងត្បូង ដែលមានប្រជាជនសរុបប្រហែល១៥លាននាក់។

វាក៏បានឆ្លងរាលដាលដល់ប្រទេសអ៊ូហ្កង់ដា ដែលនៅក្បែរខាងផងដែរ ជាទីដែលអង្គការសុខភាពពិភពលោក (WHO) បានកត់ត្រា២០ករណី ក្នុងនោះស្លាប់២ករណី ប៉ុន្តែអ៊ូហ្កង់ដាបានអះអាងថា ស្ថានការណ៍ត្រូវគ្រប់គ្រងបានវិញ កាលពីដើមខែនេះ។

គួរបញ្ជាក់ថា ការផ្ទុះករណីឆ្លងរាលដាលចុងក្រោយបង្អស់នេះ គឺបង្កឡើងដោយវីរុសអេបូឡាកម្រ ហៅថា Bundibugyo ដែលមិនទាន់មានវ៉ាក់សាំងការពារ ឬវិធីព្យាបាលជាក់លាក់។ វ៉ាក់សាំងអេបូឡាមានស្រាប់បច្ចុប្បន្ន ដែលអភិវឌ្ឍកាលពីឆ្នាំ២០១៨ និងឆ្នាំ២០១៩ គឺមានប្រសិទ្ធភាពប្រឆាំងតែវីរុសអេបូឡាមួយប្រភេទទៀតប៉ុណ្ណោះ ហៅថា Zaire ដែលធ្លាប់បង្កការផ្ទុះឆ្លងរាលដាលធំៗពីមុនៗ។ WHO បានប្រកាសវាជាភាពអាសន្នសុខភាពសាធារណៈកម្រិតអន្តរជាតិ ហើយបានព្រមានថា ការឆ្លងរាលដាលអាចបន្តរយៈពេលរាប់ខែ៕