(បាងកក)៖ កាលពីថ្ងៃចន្ទ ទី២២ ខែមិថុនា ឆ្នាំ២០២៦ នាយករដ្ឋមន្រ្តីថៃ​ លោក Anutin Charnvirakul ដែលមានតួនាទី​ជា រដ្ឋមន្រ្តីក្រសួងមហាផ្ទៃផងដែរនោះ បានបញ្ចេញទិន្នន័យឱ្យដឹងថា ជនល្មើសឆបោកអនឡាញ (Online Scam) សរុបជិត៣០ ០០០នាក់ ក្នុងនោះរួមមានទាំងមេខ្លោងរាប់សិបនាក់ ត្រូវបានចាប់ខ្លួន ហើយទ្រព្យសម្បត្តិប្រហែល ២៤ពាន់លានបាត (៧២៤លានដុល្លារ) ត្រូវបានរឹបអូស ក្នុងរយៈពេល៩ខែកន្លងមកនេះ។ នេះបើតាមការចេញផ្សាយដោយ សារព័ត៌មានថៃ Bangkok Post។

លោក Anutin បានប្រាប់ថា អំឡុងរយៈពេល៩ខែ ប៉ូលិសថៃបានចាប់ខ្លួនជនឆបោកអនឡាញចំនួន ២៩ ២៣៣នាក់ និងមេខ្លោងប្រហែល៧០នាក់ ហើយរឹបអូសទ្រព្យសម្បត្តិនិងលុយ ដែលពាក់ព័ន្ធប្រតិបត្តិការឆបោក គិតជាទឹកប្រាក់សរុបស្មើ ២៤ពាន់លានបាត។ លោកបានអះអាងប្រាប់ក្រុមអ្នកសារព័ត៌មានថា ការបង្រ្កាបនិងបោសសំអាតបណ្តាញឆបោកអនឡាញ គឺជាផ្នែកមួយនៃរបៀបវារៈជាតិរបស់រដ្ឋាភិបាលលោក ហើយសកម្មភាពម៉ឺងម៉ាត់ប្រឆាំងពួកឧក្រិដ្ឋជនទាំងនោះ បានចាប់ផ្តើម​កាលពី៩ខែមុន។

គួរបញ្ជាក់ថា ទន្ទឹមគ្នានេះ អាជ្ញាធរថៃ បានទទួលយកមកវិញនូវ ជនជាតិថៃសរុប ១ ៨៦២នាក់ ដែលត្រូវបានប្រើប្រាស់​ដោយបណ្តាញឆបោកអនឡាញ មានមូលដ្ឋានៅក្រៅប្រទេសថៃ ខណៈជនជាតិថៃ ២ ៤៨៩នាក់ ត្រូវបានចាប់ខ្លួនសម្រាប់​ការលួចឆ្លងដែនចេញ-ចូលប្រទេស ហើយពួកគេមានជាប់ពាក់ព័ន្ធក្នុងករណីឆបោកសរុប ១ ០៣១ករណី៕