(ប៉េកាំង)៖ រដ្ឋមន្ត្រីការបរទេសចិន លោក វ៉ាង យី (Wang Yi) នៅថ្ងៃអង្គារ បានអំពាវនាវឱ្យបណ្តាប្រទេសជាសមាជិក BRICS រួមគ្នាឆ្លើយតបទៅនឹងបញ្ហាប្រឈមជាសកល រាប់ចាប់ពីការផ្ទុះឡើងនៃជំងឺអេបូឡា (Ebola) រហូតដល់ការគ្រប់គ្រងបញ្ញាសិប្បនិម្មិត (AI) ព្រមទាំងជំរុញឱ្យមានការពង្រឹងកិច្ចសហប្រតិបត្តិការលើធនធានរ៉ែយុទ្ធសាស្ត្រផងដែរ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ថ្លែងនៅក្នុងកិច្ចប្រជុំសន្តិសុខនៅរដ្ឋធានីញូវដេលី (New Delhi) ប្រទេសឥណ្ឌា លោក វ៉ាង យី បានគូសបញ្ជាក់ថា ប្រទេស BRICS គួរតែរួមគ្នាដោះស្រាយបញ្ហាសន្តិសុខថាមពល និងស្បៀងអាហារសកល ព្រមទាំងរួបរួមគ្នាដើម្បីទប់ទល់នឹងការរាតត្បាតនៃជំងឺអេបូឡានៅទ្វីបអាហ្វ្រិក។ លោកក៏បានបន្ថែមថា ប្រទេសសមាជិកត្រូវតែប្រយុទ្ធប្រឆាំងដាច់ខាតចំពោះអំពើភេរវកម្មគ្រប់ទម្រង់ ប្រឆាំងនឹងការប្រើប្រាស់លំហអវកាសជាអាវុធ និងត្រូវត្រួតពិនិត្យយ៉ាងហ្មត់ចត់លើហានិភ័យនៃបច្ចេកវិទ្យា AI។

មន្ត្រីការទូតជាន់ខ្ពស់ចិនរូបនេះ បានសង្កត់ធ្ងន់ថា ក្រុម BRICS គួរតែលើកកម្ពស់ «ពហុភាគីនិយម» និងប្រឆាំងដាច់ខាតចំពោះឯកតោភាគីនិយម ព្រមទាំងគាំទ្រដល់ការប្រើប្រាស់មធ្យោបាយសន្ទនា និងនយោបាយ ដើម្បីដោះស្រាយជម្លោះផ្សេងៗ។ លោកបានបញ្ជាក់យ៉ាងដូច្នេះថា «សមាជិក BRICS ត្រូវតែឈានមុខគេក្នុងការទាមទារយុត្តិធម៌ និងការសម្រេចចិត្តប្រកបដោយភាពត្រឹមត្រូវ ដើម្បីលើកកម្ពស់តួនាទី និងឥទ្ធិពលរបស់ខ្លួននៅក្នុងកិច្ចការអន្តរជាតិ»៕