(បាងកក)៖ អង្គការសិទ្ធិមនុស្សមួយបានឱ្យដឹង នៅថ្ងៃអង្គារនេះថា មនុស្សជាង ៥,៣០០នាក់ កំពុងបន្តជាប់គាំង និងត្រូវបានបង្ខាំងទុកនៅក្នុងមជ្ឈមណ្ឌលឆបោកតាមអនឡាញ នៅក្នុងប្រទេសមីយ៉ាន់ម៉ា ក្បែរព្រំដែនប្រទេសថៃ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

នៅក្នុងលិខិតផ្ញើទៅកាន់ប៉ូលិសថៃ ដើម្បីជំរុញឱ្យមានការអន្តរាគមន៍ អង្គការសង្គមស៊ីវិលសម្រាប់ជួយជនរងគ្រោះដោយការជួញដូរមនុស្ស (CSNHTV) បានបញ្ជាក់ថា ជនរងគ្រោះភាគច្រើនជាជនបរទេស ដែលត្រូវបានបង្ខាំងទុកនៅទីតាំងចំនួន ៤កន្លែង ស្ថិតក្រោមការគ្រប់គ្រងរបស់ក្រុមប្រដាប់អាវុធមីយ៉ាន់ម៉ា DKBA។

តាមការប៉ាន់ប្រមាណ ជនរងគ្រោះទាំងនោះមានជនជាតិចិនប្រហែល ១,៦០០នាក់ ជនជាតិមីយ៉ាន់ម៉ា ២០០នាក់ ថៃ ២០នាក់ រួមទាំងពលរដ្ឋមកពីប្រទេសហ្វីលីពីន តៃវ៉ាន់ ម៉ាឡេស៊ី ប្រេស៊ីល រុស្ស៊ី កេនយ៉ា អ៊ូហ្គង់ដា រវ៉ាន់ដា និងស៊ីមបាវ៉េ ជាដើម។

អង្គការ CSNHTV បានសង្កត់ធ្ងន់ថា ដោយសារតែមិនទាន់មានការបង្ក្រាប និងរំដោះជនរងគ្រោះទាំងស្រុង ក្រុមឧក្រិដ្ឋជននៅតែបន្តធ្វើសកម្មភាពឆបោក និងជួញដូរមនុស្ស ដែលបង្កការខូចខាតដល់ប្រជាជនជុំវិញពិភពលោក ជាពិសេសនៅសហរដ្ឋអាមេរិក និងអឺរ៉ុប។ ទោះជាយ៉ាងណា ខាងភាគីក្រុមប្រដាប់អាវុធ DKBA និងរដ្ឋាភិបាលយោធាមីយ៉ាន់ម៉ា នៅមិនទាន់មានការឆ្លើយតប ឬបកស្រាយជុំវិញបញ្ហានេះនៅឡើយទេ៕