(តេហេរ៉ង់)៖ ប្រធានាធិបតីអាមេរិក លោក ដូណាល់ ត្រាំ នៅថ្ងៃអង្គារ បានប្រកាសថា ប្រទេសអ៊ីរ៉ង់បានយល់ព្រមឱ្យមានការត្រួតពិនិត្យកម្មវិធីនុយក្លេអ៊ែររបស់ខ្លួន «ដោយគ្មានដែនកំណត់» ព្រមទាំងយល់ព្រមប្រើប្រាស់ទ្រព្យសម្បត្តិដែលជាប់បង្កក ដើម្បីទិញតែស្បៀងអាហារពីសហរដ្ឋអាមេរិកប៉ុណ្ណោះ។ ប៉ុន្តែ ការអះអាងនេះត្រូវបានរដ្ឋាភិបាលទីក្រុងតេហេរ៉ង់ច្រានចោលទាំងស្រុង។

ការលើកឡើងនេះ ធ្វើឡើងក្រោយការបញ្ចប់កិច្ចចរចាជុំទី១ នៅប្រទេសស្វីស ដែលទីក្រុងវ៉ាស៊ីនតោនយល់ព្រមលើកលែងទណ្ឌកម្មលើអ៊ីរ៉ង់រយៈពេល ៦០ថ្ងៃ។ អនុប្រធានាធិបតី លោក ជេឌី វែន (JD Vance) បានបញ្ជាក់ថា ជំនួបនេះបានផ្តល់ជាមូលដ្ឋានគ្រឹះដ៏ល្អសម្រាប់កិច្ចព្រមព្រៀងចុងក្រោយ ហើយលោកអះអាងថាអ៊ីរ៉ង់បានយល់ព្រមអនុញ្ញាតឱ្យក្រុមអធិការកិច្ចនុយក្លេអ៊ែរវិលត្រឡប់ចូលប្រទេសវិញហើយ។

ផ្ទុយពីការលើកឡើងនេះ អ្នកនាំពាក្យក្រសួងការបរទេសអ៊ីរ៉ង់បានបដិសេធថា អ៊ីរ៉ង់មិនទាន់បានចាប់ផ្តើមពិភាក្សាអំពីកម្មវិធីនុយក្លេអ៊ែរឡើយ ហើយក៏មិនមានគម្រោងអនុញ្ញាតឱ្យទីភ្នាក់ងារថាមពលអាតូមិកអន្តរជាតិ (IAEA) ចូលទៅត្រួតពិនិត្យរោងចក្រនុយក្លេអ៊ែរដែលរងការខូចខាតនោះដែរ។

ជាការឆ្លើយតប លោក ត្រាំ បានបង្ហោះសារវាយបកវិញថា អ៊ីរ៉ង់កំពុង «និយាយកុហក» ហើយលោកបានបញ្ជាក់យ៉ាងច្បាស់ថា ពួកគេពិតជាបានយល់ព្រមទាំងស្រុងលើការត្រួតពិនិត្យនុយក្លេអ៊ែរកម្រិតខ្ពស់បំផុត និងបានយល់ព្រមយកប្រាក់ដែលបានដោះលែង ទៅដាក់ក្នុងគណនីពិសេស ដើម្បីទិញពោត ស្រូវសាលី និងថ្នាំពេទ្យពីអាមេរិក។ យ៉ាងណាមិញ ឯកអគ្គរដ្ឋទូតអ៊ីរ៉ង់ប្រចាំអង្គកាសហប្រជាជាតិ បានទាត់ចោលការលើកឡើងនេះ ដោយសង្កត់ធ្ងន់ថា អ៊ីរ៉ង់គឺជាម្ចាស់លុយ និងមានសិទ្ធិសម្រេចតែម្នាក់ឯងក្នុងការចាយវាយ ដោយគ្មានប្រទេសណាមួយមានសិទ្ធិមកលូកដៃបង្គាប់បញ្ជាបានឡើយ៕