(មូស្គូ)៖ ឧបនាយករដ្ឋមន្រ្តីរុស្ស៉ី លោក Alexander Novak បាននិយាយថា មូស្គូកំពុងពិចារណាដាក់បម្រាមនាំចេញប្រេងម៉ាស៊ូត ខណៈកាសែតក្នុងស្រុកមួយបានរាយការណ៍ អំពីលទ្ធភាពនាំចូលប្រេងឥន្ធនៈដើម្បីដោះស្រាយកង្វះខាត ជាពិសេសនៅតំបន់ Crimea ដែលមានការរឹតបន្តឹងលើសេវាសាធារណៈ និងសកម្មភាពនានារួចហើយ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃពុធ ទី២៤ ខែមិថុនា ឆ្នាំ២០២៦។

លោកប្រធានាធិបតី វ្ល៉ាឌីមៀ ពូទីន ក៏បានធ្វើអត្ថាធិប្បាយជាលើកដំបូងដែរ ពាក់ព័ន្ធការវាយប្រហារនាពេលថ្មីៗរបស់អ៊ុយក្រែន ទៅលើហេដ្ឋារចនាសម្ព័ន្ធស៉ីវិល រួមទាំងរោងចក្រចម្រាញ់ប្រេងរបស់ទីក្រុងមូស្គូ ដោយហៅវាថាជាឧបាយកលធ្វើឱ្យសង្គមមានភាពវឹកវរ។ លោក​ ពូទីន បាន​ប្រាប់ឱ្យរដ្ឋាភិបាល​ចាត់​វិធានការ​បន្ថែម​ ដើម្បីដោះស្រាយ​ផល​ប៉ះពាល់។

តំបន់ជាច្រើននៅរុស្ស៉ី ដែលជាប្រទេសផលិតប្រេងឆៅធំជាងគេលំដាប់ទី ៣ របស់ពិភពលោក បានរាយការណ៍ពីការរឹតបន្តឹងលើការលក់ប្រេងឥន្ធនៈ ការឡើងថ្លៃ និងការតម្រង់ជួររង់ចាំចូលចាក់ប្រេងនៅតាមស្ថានីយ៍។ រុស្ស៉ី ជាធម្មតានាំចេញផលិតផលប្រេងផ្សេងៗ ក៏ដូចជាប្រេងឆៅ តែការវាយប្រហាររបស់អ៊ុយក្រែនលើរោងចក្រចម្រាញ់ប្រេង បានបង្ខំឱ្យប្រទេសនេះហាមប្រាមលើការនាំចេញប្រេងសាំង និងប្រេងឥន្ធនៈសម្រាប់យន្តហោះ។

តាមសេចក្តីរាយការណ៍របស់កាសែត Vedomosti ការនាំចូលប្រេង ត្រូវបានលើកឡើងជាជម្រើសមួយ នៅក្នុងកិច្ចប្រជុំដែលដឹកនាំដោយឧបនាយករដ្ឋមន្ត្រី Alexander Novak កាលពីថ្ងៃចន្ទ។ ថ្លែងនៅក្នុងកិច្ចប្រជុំរដ្ឋាភិបាល ផ្សាយតាមកញ្ចក់ទូរទស្សន៍ ដែលដឹកនាំដោយ លោក ពូទីន កាលពីថ្ងៃអង្គារ លោក Novak បាននិយាយថា រុស្ស៉ី កំពុងពិចារណាលើការដាក់បម្រាមនាំចេញប្រេងម៉ាស៊ូត និងការកែប្រែច្បាប់ពន្ធដើម្បីជួយដល់ទីផ្សារប្រេងឥន្ធនៈក្នុងស្រុក៕