(តៃប៉ិ)៖ នៅថ្ងៃពុធ ទី២៤ ខែមិថុនា ឆ្នាំ២០២៦ រដ្ឋមន្រ្តីការពារជាតិនៃកោះតៃវ៉ាន់ លោក Wellington Koo បាននិយាយថា យោធាតៃវ៉ាន់ត្រូវតែធ្វើតេស្តដើម្បីស្ទាបស្ទង់ ថាតើខ្លួនអាចឆ្លើយតបភ្លាមៗបានដែរឬទេ នៅពេលមានសង្រ្គាមផ្ទុះឡើង ស្របពេល​ដែល​ពេលវេលាសម្រាប់ព្រមានអំពីការវាយប្រហារណាមួយពីចិន កំពុងកាន់តែខើចទៅៗ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

ក្នុងសប្តាហ៍នេះ តៃវ៉ាន់បាននិងកំពុងប្រារព្ធសមយុទ្ធយោធាមួយមានរយៈពេល៥ថ្ងៃ ដែលផ្តោតលើការពង្រឹងសមត្ថភាពត្រៀមលក្ខណៈប្រយុទ្ធ។ យោធាតៃវ៉ាន់ បានចាប់់ផ្តើមផ្អែកលំហាត់យោធាខ្លះរបស់ខ្លួន តាមសេណារីយ៉ូមួយ ដែលក្នុងនោះគឺចិនស្រាប់តែប្រែក្លាយការធ្វើសមយុទ្ធជាប់ជាប្រចាំរបស់ខ្លួន នៅក្បែរកោះតៃវ៉ាន់ ទៅជាការវាយប្រហារពិតប្រាកដភ្លាមៗ។

សមយុទ្ធយោធារបស់តៃវ៉ាន់ក្នុងសប្តាហ៍នេះ ផ្តោតជាពិសេសលើសមត្ថភាពដើម្បីឆ្លើយតបភ្លាមៗ​ និងផ្លាស់ប្តូរយ៉ាងរហ័ស​ទៅរក​ស្ថានភាពប្រុងជើងប្រយុទ្ធ។​ ថ្លែងប្រាប់ក្រុមអ្នកសារព័ត៌មាននៅសភាតៃវ៉ាន់ លោក Koo បានលើកឡើងដូច្នេះថា «វាមានគោលដៅកសាងភាពឆាប់រហ័ស ដែលយើងជឿជាក់ថាចាំបាច់ ដើម្បីប្រែក្លាយពីស្ថានភាពក្នុងពេលសន្តិភាព ទៅជាស្ថានភាពក្នុងពេលសង្រ្គាម។ ពោលគឺដោយសារស្ថានការណ៍គំរាមកំហែងបច្ចុប្បន្នពីសត្រូវ ហើយស្របពេលដែលយើង​ជឿថា ពេលវេលាព្រមានជាមុន កំពុងកាន់តែខើចទៅៗ យើងត្រូវតែផ្ទៀងផ្ទាត់ឱ្យច្បាស់ថា ពួកយើងពិតជាអាចឆ្លើយតបភ្លាមៗបាន»។

តៃវ៉ាន់តែងតែប្រារព្ធសមយុទ្ធយោធាជាប្រចាំ ក្នុងនោះរួមមានទាំងកាលពីពេលកន្លងទៅក្នុងខែមិថុនា នៅពេលកងទ័ពតៃវ៉ាន់ បានហ្វឹកហាត់បាញ់តេស្តប្រព័ន្ធរ៉ុក្កែតថ្មី ផលិតដោយសហរដ្ឋអាមេរិក HIMARS ចូលទៅច្រកសមុទ្រតៃវ៉ាន់។ ប្រព័ន្ធនេះ ត្រូវបានប្រើប្រាស់យ៉ាងទូលំទូលាយក្នុងសង្រ្គាមនៅអ៊ុយក្រែន។ សម្រាប់សមយុទ្ធយោធាធំប្រចាំឆ្នាំរបស់តៃវ៉ាន់ ដែលហៅថា Han Kuang គឺនឹងប្រព្រឹត្តទៅនៅខែសីហា។

គួរបញ្ជាក់ថា ចិនចាត់ទុកតៃវ៉ាន់ត្រឹមជាតំបន់មួយប៉ុណ្ណោះរបស់ខ្លួន ហើយយោធាចិន បានបន្តធ្វើប្រតិបត្តិការសឹងរៀងរាល់ថ្ងៃ នៅជុំវិញដែនកោះនេះ។ បើតាមសេចក្តីរាយការណ៍របស់ទីក្រុងតៃប៉ិ នាវាផ្ទុកយន្តហោះចម្បាំងថ្មីនិងទំនើបបំផុតរបស់ចិន ទើបតែបានបើកឆ្លងកាត់ច្រកសមុទ្រតៃវ៉ាន់ កាលពីថ្ងៃអង្គារ៕