(អាប៊ុយដាប៊ី)៖ រដ្ឋមន្រ្តីការបរទេសអាមេរិក លោក Marco Rubio ​បានចាប់ផ្តើមដំណើរទស្សនកិច្ចនៅមជ្ឈិមបូព៌ា នាថ្ងៃពុធ ទី២៤ ខែមិថុនា ឆ្នាំ២០២៦ ក្នុងគោលបំណងផ្តល់ការធានាដល់សម្ព័ន្ធមិត្តតំបន់ឈូងសមុទ្រពែក្ស ដែលកំពុងយល់ឃើញថា សម្បទានក្នុងកិច្ចព្រមព្រៀងជាមួយអ៉ីរ៉ង់ របស់ប្រធានាធិបតី ដូណាល់ ត្រាំ ដែលរួមបញ្ចូលមូលនិធិចំនួន ៣០០ពាន់លានដុល្លារសម្រាប់អ៉ីរ៉ង់ គឺហាក់ដូចជាការបើកចិត្តទូលាយខ្លាំងពេក ចំពោះប្រទេសមួយដែលជាសត្រូវក្នុងតំបន់។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។

លោក Rubio បានទៅដល់ទីក្រុង Abu Dhabi ប្រទេសអេមីរ៉ាតអារ៉ាប់រួម កាលពីយប់ថ្ងៃអង្គារ សម្រាប់ទស្សនកិច្ចរយៈពេល ៣ថ្ងៃ។ លោកកំពុងបំពេញបេសកកម្មការទូតកម្រិតខ្ពស់លើកដំបូង ពាក់ព័ន្ធកិច្ចព្រមព្រៀងសប្តាហ៍មុន ដើម្បីបញ្ចប់សង្រ្គាមរវាងសហរដ្ឋអាមេរិក និងអ៉ីស្រាអែលជាមួយអ៉ីរ៉ង់។

នៅពេលត្រូវបានសួរថា តើលោកមានគម្រោងដោះស្រាយការមិនពេញចិត្តពីសម្ព័ន្ធមិត្តអាមេរិក ចំពោះកិច្ចព្រមព្រៀងនេះឬអត់ លោក Rubio ប្រាប់អ្នកយកព័ត៌មានថា «វាពិតជានឹងកើតឡើងក្នុងការពិភាក្សា» ដោយ​បន្ថែមថា ​នឹងមាន​ការពិភាក្សា​អំពី​បញ្ហា​ ដែល​មិន​មានក្នុង​អនុស្សរណៈ​នៃ​ការ​យោគយល់។

បេសកកម្មរបស់ លោក Rubio គឺត្រូវការការពារកិច្ចព្រមព្រៀងបឋមដែល ត្រាំ ចង់បាន ហើយក៏ត្រូវដោះស្រាយការព្រួយបារម្ភ របស់សមភាគីឈូងសមុទ្រពែក្សផងដែរ។ សម្ព័ន្ធមិត្តអាមេរិក បារម្ភជាពិសេសថា អ៉ីរ៉ង់អាចប្រើប្រាស់មូលនិធិកសាងឡើងវិញ ចំនួន ៣០០ពាន់លានដុល្លារដែលបានស្នើឡើង ដើម្បីកសាងកម្លាំងយោធារបស់ខ្លួនឡើងវិញ។

ប្រទេស​ដែល លោក Rubio កំពុង​ធ្វើ​ទស្សនកិច្ច​ រួមមានអេមីរ៉ាត​អារ៉ាប់រួម និង​គុយវ៉ែត ដែលសុទ្ធសឹងជាទីតាំង នៃមូលដ្ឋានយោធាយុទ្ធសាស្ត្ររបស់សហរដ្ឋអាមេរិក ហើយប្រទេសទាំងពីរ បានរងការវាយប្រហារពីមីស៉ីលអ៊ីរ៉ង់ បណ្តាលឱ្យមានជនស៉ិវិលស្លាប់៕