(តេហេរ៉ង់)៖ ប្រទេសអ៊ីរ៉ង់នៅថ្ងៃពុធ បានប្រកាសចាត់ទុកកិច្ចព្រមព្រៀងបញ្ចប់សង្គ្រាមនៅមជ្ឈិមបូព៌ា ថាជា «ការប្រកាសពីការបរាជ័យរបស់សហរដ្ឋអាមេរិក»។ ការប្រកាសនេះធ្វើឡើងស្របពេលដែលប្រមុខការទូតសហរដ្ឋអាមេរិក កំពុងបំពេញទស្សនកិច្ចនៅតំបន់ឈូងសមុទ្រ ដើម្បីបញ្ជាក់សារជាថ្មីពីការប្តេជ្ញាចិត្តការពារសន្តិសុខដល់ប្រទេសអេមីរ៉ាតអារ៉ាប់រួម (UAE)។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន​ Reuters។

សង្គ្រាមដែលបានចាប់ផ្តើមតាំងពីចុងខែកុម្ភៈ បន្ទាប់ពីសហរដ្ឋអាមេរិក និងអ៊ីស្រាអែល បានបើកការវាយប្រហារលើអ៊ីរ៉ង់ ត្រូវបានបញ្ចប់ដោយសាធារណរដ្ឋឥស្លាមមួយនេះសម្រេចបាននូវកិច្ចព្រមព្រៀងមួយ ដែលពួកគេចាត់ទុកថាជា «ជ័យជម្នះ» របស់ខ្លួន។ ជម្លោះនេះបានបង្កភាពវឹកវរយ៉ាងខ្លាំងនៅក្នុងតំបន់ ដោយសារទីក្រុងតេហេរ៉ង់ បានសងសឹកតាមរយៈការបិទខ្ទប់ផ្លូវទឹកយុទ្ធសាស្ត្រសម្រាប់ការដឹកជញ្ជូនថាមពល និងបានបាញ់បង្ហោះដ្រូន ព្រមទាំងមីស៊ីលរាប់ពាន់គ្រាប់ ទៅលើបណ្តាប្រទេសជិតខាងក្នុងតំបន់ឈូងសមុទ្រ និងអ៊ីស្រាអែល។

កាលពីសប្តាហ៍មុន សហរដ្ឋអាមេរិក និងអ៊ីរ៉ង់ បានចុះហត្ថលេខាលើកិច្ចព្រមព្រៀងមួយ ដែលជាចំណុចចាប់ផ្តើមឆ្ពោះទៅរកដំណោះស្រាយជាអចិន្ត្រៃយ៍។ ប្រធានក្រុមអ្នកចរចាអ៊ីរ៉ង់ លោក ម៉ូហាំម៉ាត់ បាឃើ កាលីបាហ្វ (Mohammad Bagher Ghalibaf) បានសង្កត់ធ្ងន់ថា អនុស្សរណៈយោគយល់គ្នានៅទីក្រុងអ៊ីស្លាម៉ាបាដ ដែលសម្របសម្រួលដោយប៉ាគីស្ថាន មិនមែនជាលទ្ធផលនៃការដាក់សម្ពាធ ឬការបង្ខិតបង្ខំនោះទេ ប៉ុន្តែវាគឺជាលទ្ធផលនៃការតស៊ូ និងអំណាចរបស់ប្រជាជាតិអ៊ីរ៉ង់ដ៏ក្លាហាន។ លោកបានបន្ថែមថា សន្តិសុខនៅតំបន់មជ្ឈិមបូព៌ា ត្រូវតែត្រូវបានធានាដោយប្រទេសនៅក្នុងតំបន់នេះផ្ទាល់តែម្តង មិនមែនប្រទេសក្រៅតំបន់នោះទេ។

ទន្ទឹមនឹងនេះ រដ្ឋមន្ត្រីការបរទេសសហរដ្ឋអាមេរិក លោក ម៉ាកូ រូប៊ីយ៉ូ (Marco Rubio) ក៏បានចាប់ផ្តើមដំណើរទស្សនកិច្ចរបស់លោកនៅក្នុងតំបន់ឈូងសមុទ្រកាលពីថ្ងៃពុធផងដែរ ក្នុងគោលបំណងផ្តល់ភាពជឿជាក់ និងទំនុកចិត្តដល់បណ្តាប្រទេសសម្ព័ន្ធមិត្ត ដែលកំពុងធ្វើជាម្ចាស់ផ្ទះនៃមូលដ្ឋានទ័ពអាមេរិកនៅក្នុងតំបន់នេះ៕