(តូក្យូ)៖ ក្រុមមន្ត្រីនៅក្នុងប្រទេសជប៉ុន បានឱ្យដឹងថាមិនមានការខូចខាតធ្ងន់ធ្ងរ ឬជនរងគ្រោះណាម្នាក់ត្រូវបានរាយការណ៍នោះទេ បន្ទាប់ពីគ្រោះរញ្ជួយដីកម្រិត ៧,២រ៉ិចទ័រវាយប្រហារលើភាគខាងជើងនៃប្រទេស នៅព្រឹកថ្ងៃព្រហស្បតិ៍ ទី២៥ ខែមិថុនា ឆ្នាំ២០២៦។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

តាមទីភ្នាក់ងារឧតុនិយមជប៉ុន ចំណុចកណ្ដាលនៃគ្រោះរញ្ជួយដីខាងលើដែលមានជម្រៅរញ្ជួយ ៥០គីឡូម៉ែត្រ ស្ថិតនៅឯឆ្នេរនៃខេត្ត ​Iwate ហើយមិនមានការប្រកាសអាសន្នពីរលកយក្សស៊ូណាមិ នោះទេ។ ដំបូងឡើយ ទីភ្នាក់ងារឧតុនិយមជប៉ុនបានឱ្យដឹងថាគ្រោះរញ្ជួយដីនេះមានកម្រិត ៦,៩រ៉ិចទ័រ ប៉ុន្តែក្រោយមកបានកែតម្រូវវិញថាមានកម្រិតរញ្ជួយ ៧,២រ៉ិចទ័រ។

មិនមានការខូចខាតធ្ងន់ធ្ងរ ឬមានជនរងគ្រោះណាម្នាក់ត្រូវបានរាយការណ៍នោះទេ ក្នុងគ្រោះរញ្ជួយដីខាងលើ។ យ៉ាងណាក៏ដោយ នាយករដ្ឋមន្ត្រីជប៉ុន លោកស្រី Sanae Takaichi បានបញ្ជាឱ្យគ្រប់ក្រសួង និងស្ថាប័នរដ្ឋាភិបាលទាំងអស់ធ្វើការយ៉ាងជិតស្និទ្ធជាមួយអាជ្ញាធរក្នុងតំបន់ ជាមួយការអំពាវនាវឱ្យប្រជាជនរក្សាការប្រុងប្រយ័ត្នជាប់ជានិច្ច៕