(ព្រុចសែល)៖ កាលពីថ្ងៃពុធសប្តាហ៍នេះ មេដឹកនាំនៃបណ្តាប្រទេសអឺរ៉ុប បានបញ្ជាក់ជាថ្មីអំពីការប្តេជ្ញាចិត្ត ចំពោះភាពជាដៃគូលើវិស័យការពារជាតិកាន់តែរឹងមាំ នៅមុនកិច្ចប្រជុំកំពូលបក្សសម្ព័ន្ធយោធាណាតូ (NATO) បន្ទាប់ពីជម្លោះបន្តបន្ទាប់ជាមួយប្រធានាធិបតីអាមេរិក លោក ដូណាល់ ត្រាំ និងភាពតានតឹងក្នុងចំណោមសមាជិកអឺរ៉ុបសំខាន់ៗ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃព្រហស្បតិ៍ ទី២៥ ខែមិថុនា ឆ្នាំ២០២៦។

អធិការបតីអាល្លឺម៉ង់ លោក Friedrich Merz ដែលបានអញ្ជើញមេដឹកនាំអង់គ្លេស បារាំង អ៉ីតាលី និងប៉ូឡូញ មកកាន់ទីក្រុងបែរឡាំង បាននិយាយថាកិច្ចប្រជុំកំពូលណាតូ ពីថ្ងៃទី៧ ដល់ថ្ងៃទី៨ ខែកក្កដា នៅទីក្រុងអង់ការ៉ា នឹងជាពេលវេលាដើម្បីបង្ហាញពីការប្តេជ្ញាចិត្តរបស់អឺរ៉ុប ក្នុងការដើរតួនាទីជាអ្នកដឹកនាំដ៏រឹងមាំជាងមុនលើវិស័យការពារជាតិ។ លោក Merz គូសបញ្ជាក់ថា «យើងចង់បន្តសម្ព័ន្ធភាពឡើងវិញ។ យើងកំពុងពង្រឹងសសរស្តម្ភអឺរ៉ុប»។ ចំណែកសេចក្តីថ្លែងការណ៍រួមបានលើកឡើងពី «ការប្តេជ្ញាចិត្តដ៏រឹងមាំនៃបណ្តាមេដឹកនាំ ចំពោះសន្តិសុខអឺរ៉ុប-អាត្លង់ទិក និងចំណងអន្តរអាត្លង់ទិក»។

គួរបញ្ជាក់ថា ការអញ្ជើញមេដឹកនាំអង់គ្លេស បារាំង អ៉ីតាលី និងប៉ូឡូញ ទៅកាន់ទីក្រុងបែរឡាំងនាពេលនេះ បានធ្វើឡើងបន្ទាប់ពីមានឧប្បត្តិហេតុច្រើន បង្កភាពតានតឹងជុំវិញបញ្ហាការពារជាតិ និងសន្តិសុខក្នុងចំណោមដៃគូធំៗនៅអឺរ៉ុប។ អាល្លឺម៉ង់ បារាំង និងអង់គ្លេស ដែលគែហៅថាមហាអំណាចអឺរ៉ុប E3 ក៏បានប្រឈមមុខនឹងការរិះគន់ ពីប្រទេសអឺរ៉ុបមួយចំនួន រួមទាំងទីក្រុងរ៉ូម និងវ៉ាសូវី ផងដែរ ដែលថាប្រទេសទាំង ៣ បានរារាំងប្រទេសដទៃពីការពិភាក្សាជាមួយអ៊ុយក្រែន។

ទីក្រុងបែរឡាំង និងទីក្រុងប៉ារីស មានគម្រោងផលិតយន្តហោះចម្បាំងរួមគ្នា FCAS ដែលពន្យារពេលយូរមកហើយ និងត្រូវបានបោះបង់ចោលដោយសារភាពមិនចុះសម្រុងខាងយុទ្ធសាស្ត្រ និងការគ្រប់គ្រង ដែលសបញ្ជាក់ពីការលំបាកដែលអឺរ៉ុបជួបប្រទះ ក្នុងការកសាងឡើងវិញនូវផ្នែកការពាររបស់ខ្លួន ខណៈលោក ​ត្រាំ កាន់តែងាកចេញពីអង្គការ NATO៕