(ការ៉ាកាស)៖ នាថ្ងៃព្រហស្បតិ៍ ទី២៥ ខែមិថុនា ឆ្នាំ២០២៦ ប្រធានាធិបតីស្តីទីវ៉េណេស៊ុយអេឡា លោកស្រី Delcy Rodriguez បាននិយាយថា គ្រោះរញ្ជួយដីកម្រិតធ្ងន់ ដែលវាយប្រហារប្រទេសអាមេរិកឡាទីនមួយនេះ បានផ្តាច់ជីវិតមនុស្សយ៉ាងហោច ៣២នាក់ ហើយបង្កឱ្យរបួសច្រើនជាង៧០០នាក់ផ្សេងទៀត។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ក្នុងការថ្លែងសារទៅកាន់ប្រជាជាតិ លោកស្រី Rodriguez បានប្រាប់ដូច្នេះថា «គិតត្រឹមវេលានេះ យើងទទួលបានរបាយការណ៍ មានមនុស្សស្លាប់៣២នាក់ និងច្រើនជាង ៧០០នាក់បានរងរបួស ប៉ុន្តែលោកស្រីបានបន្ថែមថា មិនទាន់ទទួលបានទីន្នន័យស្តីពី​កន្លែងដែលរងគ្រោះខ្លាំងជាងគេ គឺរដ្ឋ La Guaira ដែលស្ថិតនៅក្បែររដ្ឋធានីការ៉ាកាស នៅឡើយទេ។

គួរបញ្ជាក់ថា កាលពីថ្ងៃពុធ (ពេលវេលាក្នុងតំបន់) គ្រោះរញ្ជួយធំផ្ទួនគ្នាចំនួន២ គឺមួយកម្រិត៧,២រ៉ិចទ័រ និងមួយទៀតកម្រិត៧,៥រ៉ិចទ័រ បានវាយប្រហារចំភាគខាងលិចទីក្រុងការ៉ាកាស។ ទីភ្នាក់ងារឃ្លាំមើលគ្រោះរញ្ជួយដីរបស់សហរដ្ឋអាមេរិក USGS បានប៉ាន់ប្រមាណថា វាអាចទៅរួចដែលចំនួនមនុស្សស្លាប់ជាក់ស្តែង ក្នុងហេតុការណ៍គ្រោះមហន្តរាយនេះ គឺដល់ខ្ទង់ពាន់នាក់ ឬច្រើនជាងនេះទៀត៕