(តេហេរ៉ង់)៖ នាថ្ងៃព្រហស្បតិ៍ ទី២៥​ ខែមិថុនា ឆ្នាំ២០២៦ ទីក្រុងតេហេរ៉ង់បានចោទប្រកាន់ អង្គការ NATO អំពីការចូលរួមសមគំនិតក្នុងសង្រ្គាមអាមេរិក-អ៉ីស្រាអែល ប្រឆាំងប្រទេសអ៉ីរ៉ង់ បន្ទាប់ពីប្រមុខបក្សសម្ព័ន្ធយោធានេះ បានរំលេចអំពីការគាំទ្ររបស់ NATO សម្រាប់សហរដ្ឋអាមេរិក នៅក្នុងជម្លោះ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ឆ្លើយតបការរិះគន់របស់ប្រធានាធិបតីអាមេរិក លោក ដូណាល់ ត្រាំ ចំពោះសម្ព័ន្ធមិត្ត NATO ថាមិនបានជួយគាំទ្រសង្រ្គាម អគ្គលេខាធិការ NATO លោក Mark Rutte បានប្រាប់ប្រព័ន្ធផ្សព្វផ្សាយអាមេរិក Fox News ថា យន្តហោះអាមេរិករាប់រយគ្រឿង បានហោះចេញពីមូលដ្ឋាននៅប្រទេសអ៉ីតាលី ដើម្បីធ្វើប្រតិបត្តិការ Epic Fury ដែលសំដៅលើសង្រ្គាមអាមេរិក​ប្រឆាំងអ៉ីរ៉ង់។

លោក Rutte បានបន្ថែមថា មិនតែប៉ុណ្ណោះ ប្រទេសរូម៉ានី ក៏បានកាត់បន្ថយជើងហោះហើរនិងយន្តហោះពាណិជ្ជកម្មផងដែរ ដោយសារ​តែអាកាសយានដ្ឋានរបស់ខ្លួន ត្រូវបានប្រើប្រាស់ជាមូលដ្ឋានស្តុកសាំងយន្តហោះ អំឡុងសង្រ្គាមអ៉ីរ៉ង់។ លោក Rutte បានលើកឡើងយ៉ាងដូច្នេះ បន្ទាប់ពីលោកបានជួបលោក ត្រាំ កាលពីថ្ងៃពុធ ហើយលោកប្រធានាធិបតីអាមេរិក បាននិយាយថា រូបលោកត្រូវបានធ្វើឱ្យខកចិត្ត ដោយសារតែសមាជិក NATO ដែលមិនគាំទ្រសង្រ្គាមរបស់លោកប្រឆាំងអ៉ីរ៉ង់។

អ្នកនាំពាក្យក្រសួងការបរទេសអ៉ីរ៉ង់ លោក Esmaeil Baqaei បានថ្កោលទោសការអត្ថាធិប្បាយរបស់លោក Rutte ថាជា​ចម្លើយសារភាព អំពីការចូលរួមសមគំនិតយ៉ាងសកម្ម ក្នុងសង្រ្គាមខុសច្បាប់របស់អាមេរិក ប្រឆាំងប្រទេសអ៉ីរ៉ង់ ដែលជារដ្ឋអធិបតេយ្យមួយ ជាសមាជិករបស់អង្គការសហប្រជាជាតិ។ លោក Baqaei បានចោទថា NATO បំពានយ៉ាងច្បាស់​លើបទដ្ឋាននៃច្បាប់អន្តរជាតិ ក៏ដូចជាគោលការណ៍ស្នូលនៃធម្មនុញ្ញរបស់ UN។

គួរបញ្ជាក់ថា អ៉ីតាលីបានចេញមុខដកខ្លួនឃ្លាតឆ្ងាយភ្លាមៗ ពីសម្តីរបស់លោកអគ្គលេខាធិការ NATO ដោយនិយាយថា វាជាសារមួយខុសស្រឡះទាំងស្រុង ព្រោះការលើកឡើងរបស់លោក Rutte ភាន់ច្រឡំប្រភេទនៃការហោះហើរដែលត្រូវបាន​អនុញ្ញាត។ ទីក្រុងរ៉ូមបានអះអាងថា ខ្លួនបានអនុញ្ញាតតែការហោះហើរបែបបច្ចេកទេស និងឡូជីស្ទីគរបស់អាមេរិកប៉ុណ្ណោះ អំឡុងប្រតិបត្តិការ Epic Fury នៅក្រោមកិច្ចព្រមព្រៀងមានស្រាប់យូរមកហើយ ជាមួយទីក្រុងវ៉ាស៉ីនតោន៕