(វ៉ាស៉ីនតោន)៖ កាលពីថ្ងៃពុធ ទី២៤ ខែមិថុនា ឆ្នាំ២០២៦ ប្រធានាធិបតីអាមេរិក លោក ដូណាល់ ត្រាំ បានស្នើទៅកាន់សភា ដើម្បីស្វែងរកកញ្ចប់ថវិកាបន្ថែមជិត៨៨ពាន់លានដុល្លារ ដែលភាគច្រើនគឺសម្រាប់យកទៅរ៉ាប់រងលើថ្លៃចំណាយក្នុងសង្រ្គាម​ប្រឆាំងប្រទេសអ៉ីរ៉ង់។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

សេតវិមានបានដាក់សំណើសុំកញ្ចប់ថវិកាបន្ថែមចំនួន ៨៧,៦ពាន់លានដុល្លារ ក្នុងនោះរាប់សិបពាន់លានដុល្លារគឺសម្រាប់​មន្ទីរបញ្ចកោណ ព្រមទាំងថវិកាសម្រាប់ជួយគាំទ្រកសិករអាមេរិក កិច្ចប្រឹងប្រែងឆ្លើយតបការរាតត្បាតជំងឺអេបូឡានៅអាហ្រ្វិក ហើយនិងគម្រោងហេដ្ឋារចនាសម្ព័ន្ធក្នុងស្រុក។

នាយកទទួលបន្ទុកកញ្ចប់ថវិការបស់សេតវិមាន លោក Russell Vought បានទទូចឱ្យសភាធ្វើសកម្មភាពឱ្យឆាប់រហ័ស សម្រាប់អ្វីដែលលោកហៅថា ជាសំណើសំខាន់និងបន្ទាន់មួយ។ ក្នុងនោះ រដ្ឋបាលលោក ត្រាំ បានស្នើ៦៧ពាន់លានដុល្លារ សម្រាប់មន្ទីរបញ្ចកោណ រួមមានទាំង២១ពាន់លានដុល្លារ សម្រាប់អាវុធ គ្រឿងបរិក្ខារ និងសមត្ថភាពយោធាផ្សេងៗ ១៧,៣ពាន់លានដុល្លារ សម្រាប់ថ្លៃចំណាយធ្វើប្រតិបត្តិការ និង១២,១ពាន់លានដុល្លារ សម្រាប់កម្មវិធីដែលត្រូវបានកំណត់ជាកម្មវិធីសម្ងាត់។

សំណើខាងលើគឺមកដល់ចំពេលត្រឹម១ថ្ងៃប៉ុណ្ណោះ បន្ទាប់ពីរដ្ឋសភានិងព្រឹទ្ធសភាអាមេរិក បានរួមគ្នាបោះឆ្នោតអនុម័តសេចក្តីសម្រេចមួយ ទោះមានទម្ងន់ត្រឹមជានិមិត្តរូបក៏ដោយ ដែលស្នើឱ្យលោក ត្រាំ បិទបញ្ចប់អរិភាពរបស់អាមេរិកជាផ្លូវការជាមួយអ៉ីរ៉ង់ លុះត្រាតែក្នុងករណីសភាផ្តល់ការអនុញ្ញាតច្បាស់ៗឱ្យធ្វើសកម្មភាពយោធា។

គួរបញ្ជាក់ថា វាក៏ចំពេលផងដែរ ដែលរដ្ឋបាលលោក ត្រាំ កំពុងព្យាយាមប្រែក្លាយកិច្ចព្រមព្រៀងបឋមជាមួយទីក្រុងតេហេរ៉ង់ ឱ្យក្លាយទៅជាកិច្ចព្រមព្រៀងផ្លូវការចុងក្រោយ សម្រាប់សង្រ្គាមដែលបានអូសបន្លាយតាំងពីចុងខែកុម្ភៈ ហើយធ្វើឱ្យរង្គោះរង្គើ​ទីផ្សារថាមពលពិភពលោក និងកើនឡើងថ្លៃទំនិញ ព្រមទាំងលាតត្រដាងភាពខ្វែងគំនិតគ្នា នៅក្នុងគណបក្សសាធារណរដ្ឋរបស់​លោក៕