(វ៉ាស៉ីនតោន)៖ ចៅក្រម ៣រូបនៃតុលាការព្រហ្មទណ្ឌអន្តរជាតិ (ICC) កាលពីថ្ងៃពុធសប្តាហ៍នេះ បានប្តឹងប្រធានាធិបតីសហរដ្ឋអាមេរិក លោក ដូណាល់ ត្រាំ និងរដ្ឋបាលរបស់លោក ជុំវិញទណ្ឌកម្មអាមេរិកដែលដាក់លើអ្នកទាំង ៣ កាលពីឆ្នាំមុន ដោយអះអាងថា វិធានការនោះគឺខុសច្បាប់។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃព្រហស្បតិ៍ ទី២៥ ខែមិថុនា ឆ្នាំ២០២៦។

ពាក្យបណ្តឹង ត្រូវបានដាក់ទៅកាន់តុលាការសហព័ន្ធសង្កាត់ Manhattan ដោយចៅក្រម ICC លោកស្រី Kimberly Prost ជនជាតិកាណាដា លោកស្រី Solomy Balungi Bossa ជនជាតិអ៊ូហ្កង់ដា និងលោកស្រី Reine Adelaide Sophie Alapini-Gansou ជនជាតិបេណាំង។ ពាក្យបណ្តឹងបានលើកឡើងថា ទណ្ឌកម្មរបស់សហរដ្ឋអាមេរិក ត្រូវបានដាក់ចេញដើម្បីដាក់សម្ពាធក្រៅប្រព័ន្ធតុលាការ ក្នុងគោលបំណងបង្ខិតបង្ខំចៅក្រម។

ក្រសួងការបរទេសអាមេរិក ក្រសួងហិរញ្ញវត្ថុ និងសេតវិមាន នៅមិនទាន់មានការបញ្ជាក់ទេ ជុំវិញពាក្យបណ្តឹងនេះ។

ឆ្នាំមុន រដ្ឋបាលលោក ត្រាំ បានដាក់ទណ្ឌកម្មលើចៅក្រមជាច្រើនរូបនៃ ICC ជាការសងសឹកមិនធ្លាប់មាន ពាក់ព័ន្ធការចេញដីកាចាប់ខ្លួននាយករដ្ឋមន្ត្រីអ៉ីស្រាអែល Benjamin Netanyahu និងការសម្រេចកន្លងមករបស់ ICC ក្នុងការបើកសំណុំរឿងបទឧក្រិដ្ឋកម្មសង្គ្រាម ដែលត្រូវបានចោទប្រកាន់លើកងទ័ពអាមេរិក នៅក្នុងប្រទេសអាហ្វហ្កានីស្ថាន។

ទណ្ឌកម្ម​អាមេរិក មានឥទ្ធិពល​រារាំង​សមត្ថភាព​នៃបុគ្គល​ម្នាក់ៗ ​ក្នុង​ការ​អនុវត្ត​ប្រតិបត្តិការ​ហិរញ្ញវត្ថុ​​ប្រចាំថ្ងៃ ដោយសារ​ធនាគារ​ណាមួយដែល​មាន​ទំនាក់ទំនង​ជាមួយ​សហរដ្ឋអាមេរិក ឬ​ដែល​ធ្វើ​ប្រតិបត្តិការ​ជា​ប្រាក់​ដុល្លារ នឹងត្រូវ​គោរព​តាម​ការ​រឹតត្បិត​៕