(ប៉េកាំង)៖ មន្រ្តីជាន់ខ្ពស់ផ្នែកឧស្សាហកម្មការពារជាតិចិន លោក Bian Zhigang (ពាន ជឺកាង) កំពុងស្ថិតក្រោមការស៉ើបអង្កេតពីបទពុករលួយ ដែលជាការកំណត់គោលដៅថ្មីចុងក្រោយលើមន្រ្តីថ្នាក់ខ្ពស់ ក្រោមចំណាត់ការបង្រ្កាបរបស់ទីក្រុងប៉េកាំង ក្នុងវិស័យយោធា។ នេះបើយោងតាមការចេញផ្សាយដោយទីភ្នាក់ងារសារព័ត៌មាន CNA នាថ្ងៃព្រហស្បតិ៍ ទី២៥ ខែមិថុនា ឆ្នាំ២០២៦។

​លោក Bian ដែលជាអនុប្រធានរដ្ឋបាលវិទ្យាសាស្ត្រ បច្ចេកវិទ្យា និងឧស្សាហកម្មការពារជាតិ (SASTIND) ត្រូវបានសង្ស័យពីការបំពានវិន័យ និងច្បាប់ធ្ងន់ធ្ងរ។ នេះបើគណៈកម្មការវិន័យនៃមជ្ឈិមបក្សកុម្មុយនីសចិន កាល​ពី​ថ្ងៃ​ពុធ។ ជាធម្មតាបក្សកុម្មុយនីសចិន ប្រើ​ពាក្យ​រំលោភវិន័យ និងច្បាប់​ ​តំណាងឱ្យអំពើ​ពុករលួយ និង​ការ​សូកប៉ាន់។

លោក Bian ជាមន្ត្រីចុងក្រោយគេក្នុងវិស័យការពារជាតិ និងអវកាស ដែលត្រូវបានស៉ើបអង្កេតពីបទពុករលួយ។ លោកក៏ជាអនុប្រធានរដ្ឋបាលអវកាសជាតិចិន (CNSA) ផងដែរ។ លោក Bian បានចំណាយពេលភាគច្រើន នៃអាជីពរបស់លោក នៅឯ SASTIND ដែលជាទីភ្នាក់ងាររដ្ឋាភិបាលចិន ទទួលខុសត្រូវក្នុងការសម្របសម្រួល កិច្ចការស្រាវជ្រាវ អភិវឌ្ឍ និងផលិតឧបករណ៍យោធា នៅទូទាំងវិស័យនុយក្លេអ៊ែរ អវកាស អាកាសចរណ៍ សាងសង់នាវា សព្វាវុធ និងអេឡិចត្រូនិច។

លោក Bian ត្រូវបានតែងតាំងជាអនុប្រធាន SASTIND ក្នុងខែកុម្ភៈ ឆ្នាំ២០២៤ ហើយការប្រកាសអំពីការស៉ើបអង្កេតទៅលើរូបលោក បានធ្វើឡើងនៅពេលដែលលោកកំពុងតំណែង៕